Noticias

Inauguración exposición de Juan delGado na Fundación Laxeiro

O venres día 30 de outubro, ás 20:00 h, a Fundación Laxeiro (r/ Policarpo Sanz, 15) inaugura a exposición titulada The flickering darkness, un proxecto do artista español afincado en Londres, Juan delGado (Cartagena, Murcia, 1965) que por primeira vez se exhibe en España.

The flickering darkness é unha peza audiovisual realizada en 2009, durante unha residencia de tres meses na cidade de Bogotá. Producida orixinalmente por a Universidade dos Andes, como parte do programa de residencias artísticas entre Colombia e Reino Unido, o proxecto foi apoiado por o British Council, o Ministerio de Cultura e o Consello das Artes UK.

Todo o traballo de Juan delGado baséase na idea de facer visibles realidades, xeralmente de carácter social, que se atopan en estado latente. Utilizando a plasticidade visual como reclamo, o artista vai construíndo unha obra visualmente atractiva e impecable dende un punto de vista formal que, unha vez que nos atrapa, fálanos de aspectos concretos que a delGado lle interesa resaltar, aspectos normalmente silenciados polo discurso oficial que o autor, á maneira dun arqueólogo, fai aflorar. The flickering darkness constitúe un exemplo paradigmático desa forma de traballar.

Na obra, Juan delGado explora a viaxe percorrida polos alimentos dende a súa chegada ao mercado, ata o seu consumo final. O filme, proxectado en tres canles, mostra a cidade nas súas cores típicas, nas súas texturas, silencios e sons, para capturar o sentido do caos e a contradición, e convidar ao espectador a reflexionar acerca dos estratos sociais e a xestión dos recursos alimentarios.

 

A exposición permanecerá aberta ao público ata o 31 de xaneiro de 2016.

Presentación Festival "vertixeVIGO15"

A Concellería de Cultura e maila Asociación Cultural VERTIXE SONORA presentan a terceira edición do festival vertixeVIGO15, un festival internacional de creación musical contemporánea que se extenderá durante todo o mes de novembro.

Este festival sérvelles de plataforma de presentación aos novos creadores internacionais e permite establecer vínculos culturais que reforcen a nosa identidade nun marco globalizado, dando mostra en tempo real da rica diversidade que está a renovar o discurso das artes sonoras na nosa época, e na que VERTIXE VIGO quere desempeñar un activo protagonismo.  Vangarda e contemporaneidade son conceptos estreitamente vinculados ao festival e tamén á cidade de Vigo, sempre prolífica e punteira na creación cultural emerxente.

VertixeVIGO é un festival urbano que, ademais, espállase polos espazos emblemáticos da cidade en música e creación artística. Conservatorio, MARCO, Verbum, Fundación Laxeiro e Universidade forman parte desa rede do festival.

10 estreas mundiais, 7 concertos, 2 obradoiros, 9 conferencias e 15 países representados. VertixeVIGO chega á súa terceira edición para consolidarse como un dos espazos europeos de difusión da música contemporánea máis innovadores e a principal plataforma española para coñecer a creación musical experimental emerxente no ámbito internacional.

Poderemos escoitar estreas mundiais de compositores provintes de diferentes partes do planeta que escolleron esta plataforma para a súa presentación en España. Juan Pablo Carreño (Colombia), Pablo Galaz (Chile), Arash Yazdani (Irán), Natalia Prokopenko (Rusia), Edgar Barroso (México), Elena Rykova (Rusia), Miguel Ángel Tolosa (España), Ingar Zach (Noruega), Andrés Nuño De Buen (México) e Murat Çolak (Turquía). Tamén estarán por primeira vez en Galicia Espai Sonor de Sueca (Valencia), Nou Ensemble de Palma de Maiorca ou V. Salvi xunto a Miguel Carvhallais do Porto (Portugal).

Nesta nova singradura incorpóranse os singulares proxectos educativos ALIEN e MÚSICAPORDENTRO coa vontade de afianzar a presenza internacional das institucións galegas procurando modelos interinstitucionais que promovan a innovación e aglutinen propostas illadas para a súa mellor visibilización.

Organizada por Vertixe Sonora, un dos colectivos máis destacados na aposta pola música contemporánea e polo diálogo e a confluencia entre a música e as artes, quere converter á cidade nunha sala de concertos, explorando novas relacións entre os espazos e o público, establecendo sinerxías que permitan ofrecer contidos culturais de calidade cun aproveitamento máximo dos recursos e infraestruturas da cidade.

Fin de semana de teatro no Auditorio Municipal do Concello

Esta fin de semana, o Auditorio Municipal do Concello (praza do Rei, 1) acollerá dous espectáculos teatrais dirixidas a público adulto:

O venres día 16, ás 21:00 h, dentro do ciclo Vigocultura, Producciones Viridiana presentará a súa obra "Ligeros de equipaje. Crónica de la retirada", con Pedro Rebollo e Javier García. "Ligeros de equipaje" son os cachos rotos da memoria de alguén que lembra sen querer recordar, que conta sen querer contar, que relata a súa vida sen saber se mente porque todo é absurdo dabondo fálanos do home común, a faciana que nos mira desde a foto en branco e negro e do que non sabemos o nome. Grupo de refuxiados -di a foto- e non sabemos máis, unhas caras tristes que nos miran desde o pasado. "Ligeros de equipaje" pretende, cunha historia de ficción creada con multitude de crónicas e testemuñas, recuperar a verdadeira historia de centos de miles de persoas. Unha historia case esquecida, perdida no tempo.

O prezo da entrada é de 8 € e pódense adquirir anticipadamente a través do servizo de Ataquilla (www.ataquilla.com, tlf 902.504.500 ou no despacho de billetes da Central de Espectáculos), ou o mesmo día do espectáculo a partir dunha hora antes do seu comezo, no despacho de billetes do Auditorio (sempre que houbese entradas dispoñibles). Existe tamén a posibilidade de abonos en paquetes de 5 ou 10 espectáculos do citado cilo, con importantes descontos do 15 e 25 % respectivamente.

O sábado 17, ás 21:00 h, e o domingo 18, ás 19:00 h, a compañía A PANADARÍA estrea a obra "Panamericana", coa colaboración da Concellería de Cultura. "Panamericana" é a historia dunha muller que foxe do seu país na procura dunha vida mellor no final da dourada e vella Europa, en Galicia. Este soño vaise esparexer cando se ve obrigada a entrar no labiríntico, absurdo e inhumano aparello burocrático habitado por persoas-formigas. Asolagada polos medos e angurias, recóllese nas súas lembranzas de tempos mellores, o pasado idealizado, máxico e fantástico. Unha historia na que o realismo máxico e a maxia real, unha mestura na que xa non sabemos se este mundo é como é ou como nós o percibimos. "Panamericana" é unha parábola dunha Galicia tropical que nos fala dun sistema perverso e dos soños rotos dende unha óptica optimista. Unha festa de música, cor e teatro.

O prezo da entrada é de 7 € e pódense adquirir tamén anticipadamente a través do servizo de Ataquilla ou o mesmo día do espectáculo, a partir dunha hora antes do seu comezo, no despacho de billetes do Auditorio (sempre que houbese entradas dispoñibles).

Comeza a programación municipal de artes escénicas "Vigocultura"

Este venres, 2 de outubro, da comezo a programación municipal de artes escénicas, Vigocultura, que se desenvolverá no Auditorio Municipal do Concello (praza do Rei, 1) durante os meses de outubro, novembro e decembro.

A artista Guadi Galego será a encargada de inaugurar o ciclo, ás 21:00 h, co seu traballo "Lúas de Outubro a Agosto", que supón a súa confirmación como unha artista non englobada nun xénero determinado senón con selo propio. As súas composicións marcan un son pop, pero cheo da esencia do aprendido do percorrido pola maxia da vida.

Nesta nova temporada, a Concellería volve apostar por unha liña de continuidade que pretende seguir consolidando públicos a través das artes escénicas cos mellores espectáculos de música, teatro e danza que están nestes momentos circulando en Galicia e fóra dela. A programación conta para este derradeiro trimestre do ano cun total de 19 funcións, que abarcan diversos xéneros como a música pop, a música de autor, teatro dramático, contemporáneo, musicais, comedia, danza contemporánea e hip hop, dentro do ciclo dirixido ao público adulto, e a música, teatro, musicais, clown, circo, monicreques, danza e maxia, dentro do ciclo dirixido a público familiar.

O prezo de entrada dos espectáculos para público adulto, como neste caso, é de 6 € para os de danza e música e 8 € para os espectáculos teatrais, e as dos espectáculos dirixidos a público familiar terán un prezo de 5 € . As entradas podense adquirir anticipadamente a través do servizo de Ataquilla (www.ataquilla.com, tlf 902.504.500 ou no despacho de billetes da Central de Espectáculos), ou o mesmo día do espectáculo a partir dunha hora antes do seu comezo, no despacho de billetes do Auditorio (sempre que houbese entradas dispoñibles).

Existe tamén a posibilidade de abonos en paquetes de 5 ou 10 espectáculos, con importantes descontos do 15 e 25 % respectivamente.

Exposición "Xaime Isla. Raíz e utopía de Galicia" na Casa Galega da Cultura

O venres 2 de outubro, ás 12:00 h, terá lugar na sala de exposicións da Casa Galega da Cultura (praza da Princesa, 2) a inauguración da exposición "Xaime Isla. Raíz e utopía de Galicia", organizada pola Fundación Isla Couto coa colaboración da Concellería de Cultura.

A exposición ten por obxectivo divulgar a vida e obra de Xaime Isla Couto como figura central do galeguismo xuvenil durante a II República, como persoeiro senlleiro da Xeración Galaxia no seo do galeguismo político-cultural de resistencia democrática á Dictadura e como emprendedor socio-cultural e empresarial en favor do desenvolvemento de Vigo e Galicia ao longo de toda a súa vida.


A figura de Xaime Isla Couto permite analizar a evolución de Vigo e Galicia entre os anos 30 e os comezos do século XXI desde unha perspectiva democrática, galeguista e universalista.


O comisariado da exposición estará ao cargo de Xosé Luis Pastoriza Rozas, investigador da Fundación Isla Couto, e permanecerá aberta ao público ata o 2 de novembro.

Prórroga de exposicións no Museo de Castrelos e maila Pinacoteca Municipal

A Concellería de Cultura prorroga as exposicións "Vigo. Paisaxes doutra época" e "Estraño cotián", que se amosan actualmente na Pinacoteca Municipal "Francisco Fernández del Riego" e no Museo "Quiñones de León" de Castrelos, respectivamente, ata o 10 de xaneiro de 2016.

"Vigo. Paisaxes doutra época" presenta unha breve selección de obras de arte cuxo tema é a cidade de Vigo e a súa contorna entre, aproximadamente, os anos 1830 e 1930. Obras na súa maioría de autores practicamente descoñecidos polo gran público, con vistas e paisaxes que tampouco nos resultarán doadas de identificar de tanto como se transformou a cidade no seu desenvolvemento.

"Estraño cotián. A colección de Artes Decorativas do Museo Municipal de Vigo Quiñones de León” recupera unha serie de obxectos da colección de artes decorativas do Museo Municipal de Vigo, obras que teñen relación coa convivencia diaria das persoas e que, na súa maior parte, chegaron ao museo fóra do seu contexto orixinal. Partindo desta idea elabórase un discurso diferente ao habitual que parte duns obxectos que, ainda que hoxe son estraños, noutro tempo foron cotiáns. Este aparente paradoxo é o que permite a súa visión como obras de "carácter maior", conferíndolles un novidoso e sorprendente protagonismo que chega ao espectador, á cultura e á mentalidade na que estes obxectos se crearon e utilizaron.

Pola súa banda, este domingo día 27 de setembro clausúrase a exposición "O fermoso rostro do País" na Pinacoteca Municipal, que será substituída por unha nova mostra que se inaugurará durante este último trimestre do ano.

Programación da Biblioteca Municipal "Neira Vilas" para derradeiro trimestre de 2015

A Biblioteca Municipal "Xosé Neira Vilas" (r/ Martínez Garrido, 21) presenta a súa programación para o derradeiro trimestre de 2015, que inclúe unha serie de actividades diversas, dirixidas a todos os públicos, e onde destacan as xa habituais como "As tardes do Roque", "A hora dos contos", "Contos Dakí" ou "Entre arrolos e contiños", ademais do clube de lectura.

Compleméntase coas actividades mensuais como o “Contacontos en inglés” e o curso  “Achégate a internet” e  as mostras bibliográficas:  “Non lembro o título pero...Día das bibliotecas” e “Samaín”.

Programación municipal de artes escénicas, Vigocultura, de outubro a decembro

A Concellería de Cultura presenta a programación municipal de artes escénicas VIGOCULTURA, que se desenvolverá no Auditorio Municipal (praza do Rei, 1), no periodo de outubro a decembro. O programa inclúe unha oferta diversa, con espectáculos para público adulto os venres ás 21:00 h e para público familiar os domingos ás 18:00 h.

Nesta nova temporada, a Concellería volve apostar por unha liña de continuidade que pretende seguir consolidando públicos a través das artes escénicas cos mellores espectáculos de música, teatro e danza que están nestes momentos circulando en Galicia e fóra dela. A programación conta para este derradeiro trimestre do ano cun total de 19 funcións, que abarcan diversos xéneros como a música pop, a música de autor, teatro dramático, contemporáneo, musicais, comedia, danza contemporánea e hip hop, dentro do ciclo dirixido ao público adulto, e a música, teatro, musicais, clown, circo, monicreques, danza e maxia, dentro do ciclo dirixido a público familiar.

Ademais, inclúense dúas colaboracións para apoio a montaxes escénicas: por un lado A Panadaría, que actuará o sábado 17 e o domingo 18 de outubro, e por outro lado Mofa e Befa que estará o sábado 7 de novembro.

Nesta programación participan un total de 11 compañías e grupos galegos (9 delas a través da Rede Galega de Teatros e Auditorios e 2 colaboracións) e 8 compañías de fóra de Galicia a través do programa estatal Platea, todas elas de recoñecido prestixio no ámbito das artes escénicas estatais e moitas recoñecidas con premios e nominacións.

O prezo de entrada dos espectáculos para público adulto será de 6 € para os de danza e música e 8 € para os espectáculos teatrais, e as dos espectáculos dirixidos a público familiar terán un prezo de 5 € . As entradas podense adquirir anticipadamente a partir do martes día 15 de setembro a través do servizo de Ataquilla (www.ataquilla.com, tlf 902.504.500 ou no despacho de billetes da Central de Espectáculos), ou o mesmo día do espectáculo a partir dunha hora antes do seu comezo, no despacho de billetes do Auditorio (sempre que houbese entradas dispoñibles).

Os abonos podense combinar entre todos os espectáculos en paquetes de 5 ou 10 espectáculos, con importantes descontos do 15 e 25 % respectivamente (quedan fóra dos abonos os dous espectáculos realizados en colaboración).

Inauguración exposición "75 aniversario do concurso Internacional de Tenis de Vigo -Copa Bedriñana" na CGC

O mércores 9 de setembro, ás 20:00 h, inaugúrase na sala de exposicións da Casa Galega da Cultura (praza da Princesa, 2) a exposición "75 ANIVERSARIO DO CONCURSO INTERNACIONAL DE TENIS DE VIGO -COPA BEDRIÑANA", organizada polo Club de Campo de Vigo, coa colaboración do Concello de Vigo.

Os 75 anos de historia do Concurso Internacional de Tenis do Club de Campo son algo máis ca unha crónica deportiva. É a historia mesma da cidade a que revive nas imaxes desta exposición. No 1925, a incipiente afección dun pequeno grupo de adeptos, habituais do Cable Inglés e das primeiras pistas de coñecidas familias locais, rematou dando lugar ao concurso pola Copa Bedriñana.

Recuperado xa con continuidade desde 1940, o percorrido por estes 75 anos de Concurso Internacional é un paseo pola sociedade e o deporte vigués, coa participación de figuras locais ou internacionais de todas as décadas do tenis; onde destacan con nome propio os Santana, Gisbert ou Orantes, e tamén futuras estrelas da ATP como Sergio Casal, Sergi Bruguera, Alex Corretja ou o mesmo Rafa Nadal.

 

A exposición permanecerá aberta ao público ata o 20 de setembro de 2015.

Visitas guiadas á exposición "eclectiCIDADE" na Casa das Artes

A Concellería de Cultura oferta a partir do luns 7 de setembro visitas guiadas polos autores á exposición "eclectiCIDADE. Diálogos coa imaxe contemporánea en Vigo", que ten lugar na planta baixa da Casa das Artes (r/ Policarpo Sanz, 15).

As visitas realizaranse según o seguinte:

- Luns 7, ás 20:00 h.- Jacobo Pérez Bouzada e Luis Díaz Díaz.
- Martes 8, ás 20:00 h.- Rosa Neutro, Xabier Fernández e Juan Teixeira.
- Mércores 9, ás 20:00 h.- Ricardo Pardo e Cristina Brea.
- Xoves 10, ás 20:00 h.- Sandra Mg e Ana Fresco.
- Venres 11, ás 20:00 h.-  Roi Alonso, Julia Aranda e Ganiel Garzee.
- Domingo 13, ás 12:30 h.- Xisela Franco.

eclectiCIDADE desenvólvese dentro dunha cidade que, por tradición e debido a súa situación estratéxica entre ambos continentes, foi dende sempre un foco constante de influencias externas que soubo asimilar e acoller multiplicidade de formas e estilos de vida que permanecen recollidos, por exemplo, na súa arquitectura con obras significativas de arquitectos como Jenaro de la Fuente e Michel Pacewicz.

A planta baixa da Casa das Artes acolle os traballos de 13 artistas visuais emerxentes da cidade de Vigo. Nesta exposición conviven proxectos visuais moi heteroxéneos entre si que abordan temas como a memoria, o cine, os conflitos bélicos, a paisaxe, a arquitectura e a identidade en obras realizadas baixo diferentes linguaxes como a fotografía, o vídeo, a fotomontaxe ou os límites entre videoarte e cine. A exposición inaugurouse o pasado 7 de agosto con motivo do programa cultural A NOITE BRANCA 2015 que organizou a Concellería de Cultura.

Páxinas

Subscribe to Noticias