Noticias

Festival da música e das artes "Nas Ondas"

A Concellería de Cultura colabora na segunda edición do Festival da música e das artes "Nas Ondas", unha programación organizada polo Conservatorio Superior de Música de Vigo e que contará con numerosas actuacións, espalladas entre marzo e xuño. O certame terá como espazo principal o Auditorio "Martín Códax" e dependencias do CSMVigo, pero tamén se trasladará a outros lugares da cidade, como o Auditorio Municipal do Concello, o salón de actos do MARCO, o Auditorio de Beade ou a Praza da Pedra.

O festival organízase nunha serie de ciclos especializados: De Piano, Explurart, Letras Galegas, Ciclo de Cámara, etc., e outros eventos diversos, todos eles, abertos ao público xeral, e de asistencia libre e gratuíta. Xunto aos actos artísticos (concertos, montaxes escénicos, performances, etc.), o festival inclúe tamén relatorios, concursos, actos conmemorativos, xornadas de Portas Abertas, etc.

A través do programa de actividades Abrente, que se desenvolve en paralelo aos ciclos do festival, o CSMVigo establece colaboracións con outros centros e institucións, e intenta achegarse tanto a públicos especializados na música (alumnado, profesionais, etc.) como á cidadanía en xeral, facilitando no posible a difusión do quefacer diario do CSMVigo.

Igualmente, e indo máis alá da nosa contorna máis inmediata, o festival integra a presenza de numerosos docentes internacionais a través do programa Erasmus+. Trátase en definitiva dun programa transversal que trata de dar conta da multiplicidade das accións desenvolvidas desde o CSMVigo a prol dunha acción formativa, pero tamén social e cultural, comprometida coa cidade e máis alá.

Inauguración da exposición "O traxe e o viño fan o camiño" na Casa Galega da Cultura

O venres, 24 de marzo, ás 19:00 h, terá lugar na sala de exposicións da Casa Galega da Cultura (praza da Princesa, 2), a inauguración da mostra "O traxe e o viño fan o camiño", integrada nos actos da Reconquista da Vila de Vigo, organizados pola AVC do Casco Vello, coa colaboración da Concellería de Cultura.

O obxectivo desta exposición é dar a coñecer pequenos retallos da nosa historia que unidos formen unha imaxe de como vivían os nosos devanceiros hai máis de cen anos, e por suposto como vestían. Nesta ocasión imos retroceder 110 anos e coñecer como facían o viño e todas as tarefas arredor del.

Nesa época o que se cultivaba en cada fogar era para uso propio maioritariamente; o millo para facer pan e dar de comer ao gando, a horta para o sustento da familia e a uva para consumo na casa. O coidado da viña (poda, sachado, sulfatado, vendima, etc.) eran labores que se distribuían ao longo do ano. Este era un proceso duro, principalmente na nosa zona onde as viñas estaban emparradas baixas polo que tiñan que traballar axeonllados. Para ter un bo viño comezaban no inverno podando e atando as viñas, este era un proceso que había que coñecer moi ben, xa que unha mala poda estragaba a viña e reducía a produción de uva. Despois de podar ataban as viñas con vimbio.

Había que sachar as viñas para mantelas limpas de malas herbas e tiñan que sulfatalas para evitar enfermidades como o mildeu. Cando a uva madura, nos meses de setembro ou outubro, chega o momento de vendimar. A uva recollese e trasladase á bodega onde se esmaga e prensa para sacar o mosto que se introducía en barrís de carballo, onde fermentaba e se gardaba para usalo. Co bagazo (restos de uvas que quedaban despois de sacar todo o mosto) facían a augardente branca, se só se destilaba o bagazo, e de herbas se se engadían herbas aromáticas que lle daban o sabor característico.

Para estas tarefas a roupa que usaban era roupa de cotío, cómoda e sufrida, confeccionada con teas rústicas e fortes fabricadas artesanalmente (liño, pano, estameña, etc.) que resistían o paso do tempo. Inda que a maioría non tiña máis que unha muda, sentíanse orgullosos do seu traxe, e aínda que sinxelo, adornabanno con bordados, lorzas, etc e tinguían o liño para darlle cor, etc.

A exposición está comisariada por Patricia González Iglesias, formada como deseñadora de moda e patronista-escaladora. Crea o seu propio obradoiro de costura hai case 17 anos, onde investiga, deseña e confecciona artesanalmente traxes tradicionais, fundas para instrumentos a medida, vestidos para gaitas, etc. Dende hai anos é a profesora responsable do curso de costura tradicional da Asociación Veciñal do Casco Vello de Vigo, así como do asesoramento e confección do vestiario da representación da "Festa da Reconquista da Vila de Vigo". Posuidora de diversas distincións, tales como Certame de Xóvenes Deseñadores de Camariñas, Certame de Promoción da Moda Vigoferia e Mostra de Novos Creadores de Moda da Xunta de Galicia, ten tamén participado en conferencias e exposicións (A Reconquista de Vigo no Museo Quiñones de León, Mostra do Traxe Tradicional Galego no Casco Vello do Concello de Vigo, etc.).

A exposición conta coa participación de creadores escenógrafos, estudantes desta arte na ESAD de Galicia, xa que Vigo foi a cidade que veu nacer aos primeiros titulados superiores de Galicia nesta disciplina, que goza dun prestixio e dun recoñecemento importante a nivel internacional.

A exposición permanecerá aberta ao público ata o 16 de abril, e contará con horarios de apertura especiais o sábado 2 e domingo 3 (de 11:00 a 14:00 h e de 17:00 a 21:00 h).

A Fundación Penzol súmase á conmemoración do "Día de Rosalía"

O venres 24 de febreiro cúmprense 180 anos do nacemento de Rosalía de Castro, no que Galicia conmemora o Día de Rosalía para recoñecemento e ensalzamento de quen se convertiu nun dos signos máis importantes da nosa identidade.

A Fundación Penzol incorpórase a esta celebración expoñendo algúns documentos e publicacións existentes nos seus fondos, na entrada de acceso á Casa Galega da Cultura (praza da Princesa, 2). Esta mostra poderá ser visitada polo público, de luns a venres, 10:00 a 13:30 h e de 17:00 a 19:30 h. Ademais, ás 11:00 h, 12:00 h, 18:00 h e 19:00 h, explicaranse os contidos e pormenores do material exposto ás persoas presentes.

O material que se expón é o seguinte:

- Folla manuscrita de Rosalía con recolleita de cantares populares galegos.

- Correspondencia que dá conta de que aínda vive María Josefa Martínez Viojo, tía de Rosalía que a coidou de pequena en Ortoño:

     . Carta de Lois Tobío Campos a Rosalía de Castro.

     . Carta de Rosalía de Castro a Lois Tobío Campos.

     . Carta de Alejandra Murguía a Lois Tobío Castro.

- Libro “Cantares Gallegos”. Primeira edición do ano 1863 e outras posteriores.

- Libro “Follas Novas”. Primeira edición feita polo vigués Alejandro Chao en La Habana e outras edicións posteriores.

- Libro “Poesies Gallègues”. Tradución ao catalán dun extracto de Cantares Gallegos. Edición do ano 1917.

- Libro da tradución ao xaponés de “Cantares Gallegos”. Editado o ano 2009.

Traslado de data da conferencia sobre a exposición "Hoxe toca o Prado"

Comunícase que, por axustes organizativos, a conferencia prevista para este venres, día 24, no salón de actos da Casa Galega da Cultura a cargo de Fernando Pérez Suencun, xefe de Contidos Didácticos da Área de Educación do Museo Nacional del Prado e comisario da exposición "Hoxe toca o Prado", trasládase ao mes de abril, en data a concretar e que se anunciará no seu momento.

Inauguración da exposición accesíbel "Hoxe toca o Prado" na Pinacoteca FFR

O Museo Nacional del Prado e a Concellería de Cultura presentan a exposición "Hoxe toca o Prado”, que se inaugura o venres 24 de febreiro, ás 12:00 h, na Pinacoteca Municipal Francisco Fernández del Riego (r/ Abeleira Menéndez, 8), baixo o patrocinio da Fundación AXA e a colaboración da ONCE.

A exposición presenta reproducións en relevo dalgunhas das pinturas máis representativas do Museo Nacional del Prado. Son o Noli me tangere, de Correggio; A Gioconda, do taller de Leonardo da Vinci; A Fragua de Vulcano, de Velázquez; O cabaleiro da man no peito, de El Greco; o Bodegón con alcachofas, flores e recipientes de vidro, de Van der Hamen, e A antuca, de Goya. Móstrase tamén a reprodución dunha obra dos fondos municipais do Museo "Quiñones de León": Santa Cecilia, atribuída a Carlo Dolci.

Unha audioguía ofrece as indicacións necesarias para facer o percorrido táctil das pezas expostas. A exposición conta así mesmo con paneis e cartelas en braille. É, polo tanto, especialmente accesible a persoas con algún tipo de discapacidade visual.

Ademais, ofrécense lentes opacas —que impiden a visión— para lles facilitar esta interesante experiencia sensorial a todos os visitantes da exposición.

A exposición permanecerá aberta ao público ata o 14 de maio.

O espectáculo de rúa "Fitness" de Ibuprofeno Teatro celébrase este venres 17 de febreiro

Este venres, 17 de febreiro, ás 18:00 horas, a compañía Ibuprofeno Teatro retoma o espectáculo de rúa FITNESS, previsto inicialmente para o pasado 27 de febreiro e que foi cancelado por inclemencias metereolóxicas, dentro da programación de Vigocultura.

Fitness é un espectáculo itinerante, no que a pallasa Marián Bañobre percorrerá en bicicleta o centro de Vigo, desde a Porta do Sol até o Mercado do Progreso, facendo deporte en todas as súas variedades, interaccionando e captando a atención dos transeúntes. Desde o humor e a sutileza dunha clown muda e con certo aire de misterio, ofrecerase un retrato crítico de certos clixés construídos socialmente arredor do universo feminino, relacionados coa obsesión polo aspecto físico, o coidado do corpo e a saúde, detrás dos que hai emocións máis íntimas como a autoafirmación ou a soidade.

O percorrido será: Porta do Sol e rúa Príncipe. Desde a Praza da Princesa até a farola de Urzáiz.

I Festival Internacional "Xoves clásicos de Vigo"

Este xoves, día 9 de febreiro, comeza o I Festival Internacional "Xoves clásicos de Vigo" que organiza a Asociación de Música Clásica de Galicia, coa colaboración da Concellería de Cultura. Os concertos terán lugar ata o 6 de abril no Auditorio "Martín Codax" do Conservatorio Superior de Música (r/ Manuel Olivié, 23).

O festival nace coa idea de ofrecer un programa variado e de calidade, coa participación de reputados intérpretes nacionais e internacionais. Así, o concerto inaugural correrá a cargo da soprano Marta de Castro, xunto ao pinanista Ricardo Francia. Outros artistas como Margherita Marseglia, Miquel Pérez Perelló, Scaramuccia Ensemble, Josu de Solaun, Cuarteto Compostela, András Kemenes, Jesús Reina, Bobby Chen e La Bellemont Ensemble, completan o cartel de concertos desta primeira edición.


As entradas están á venda no servizo de Ticketea.

Gañadores/as do "XXI Maratón Fotográfico"

Hai uns intres, durante o acto de inauguración da exposición na Casa das Artes (r/ Policarpo Sanz, 15), déronse a coñecer as persoas gañadoras dos premios estipulados nas bases do "XXI Maratón Fotográfico" que tivo lugar os días 10 e 11 de decembro pasados.

Nesta ocasión foron un total de 91 participantes que tiveron 24 h para fotografar catro temas: "Resplandor", "Construindo", "Clandestino" e "Oco".

O xurado, presidido polo concelleiro-delegado da Área de Cultura, Cayetano Rodríguez Escudero, estivo composto por:

Eva Díez, fotógrafa

David Hernández, autor cinematográfico

Iria Vázquez, artista multidisciplinar

Miguel Vidal, fotógrafo

 

Os premios concedidos ás series fotográficas foron os seguintes:

- Primeiro premio, dotado con 1.000 €: Antonio Álvarez Vidal

- Segundo premio, dotado con 500 €: Fran Pedreira

- Terceiro premio, dotado con 300 €:  Adrián Freiría Díaz

- Dous accesit: Manuela Mateo-Morales e Thibaud Dupuy

 

A exposición, na que se expoñen a obra de todos os participantes e de forma ampliada a dos 25 seleccionados, permanecerá aberta ao público ata o 12 de marzo.

Inauguración das exposicións do "XXI Maratón Fotográfico" e "II Concurso de Narración Fotográfica Clína Dra. Susana Santeiro"

Este xoves día 2 de febreiro, ás 20:00 h, inaugúranse no primeiro andar da Casa das Artes (r/ Policarpo Sanz, 15) as  exposicións correspondentes ao "XXI Maratón Fotográfico Concello de Vigo" e mailo "II Concurso de Narración Fotográfica Clínica Dra. Susana Santeiro".

O "XXI Maratón Fotográfico" está organizado pola Agrupación Fotográfica Galega, coa colaboración da Concellería de Cultura e da Clínica Dr. Susana Santeiro. O maratón tivo lugar o 10 e 11 de decembro pasados, con preto de 100 participantes que tiveron 24 h para fotografar catro temas: "Resplandor", "Construindo", "Clandestino" e "Oco". Como é costume, durante o acto de inauguración, o xurado dará a coñecer as persoas gañadoras dos premios estipulados nas bases e que se conceden á serie fotográfica:

Primeiro premio: 1.000 €

Segundo premio: 500 €

Terceiro premio: 300 €

En canto ao "II Concurso de Narración Fotográfica Clínica Dra. Susana Santeiro", nesta segunda edición presentáronse un total de 70 participantes de España e Portugal, adquirindo por tanto repercusión internacional. As bases do concurso estipulaban que se debería contar unha historia nun mínimo de dúas e un máximo de seis fotografías, creando unha secuencia de imaxes cun fío conductor que xenere un relato. Os premios, que se entregarán o día 9 de marzo, están dotados cun importe de:

1º Premio: 1.000 € + Diploma

2º Premio: 500 € + Diploma

3º Premio: 250 € + Diploma

Premio especial do público: 300 € + Diploma

3 accésits: 50 € + Diploma

Premio de honor "Clínicas Dentais Susana Santeiro": 300 €


As exposicións permanecerán abertas ao público ata o 12 de marzo.

Programación municipal de artes escénicas "Vigocultura" para período febreiro-abril

A Concellería de Cultura presenta a programación municipal de artes escénicas "Vigocultura" que se desenvolverá no Auditorio Municipal do Concello (praza do Rei,1) dende o venres 3 de febreiro ao domingo 30 de abril, ambos inclusive. Tralo éxito acadado no 2016 en canto ás cifras de asistencia, vólvese a apostar para o ano 2017, dentro das liñas de programación que veñen sendo habituais, por incluír espectáculos con novas linguaxes e formatos escénicos nunca vistos até o momento na programación do auditorio.

No ano 2016, a programación "Vigocultura" tivo un total de 9.000 espectadores, sendo os espectáculos mellor valorados polos espectadores o Monólogo do imbécil, da compañía Eme2 Emocion&Arte, Kepa Junkera&Sorginac en concerto e The Funamviolistas, no que respecta a público adulto, e Chíos, espectáculo para bebés da compañía Teatro da Semente, Chefs, da compañía Yllana, e Invención, do grupo Odaiko, en canto ao público familiar.

A programación para este semestre, composta por espectáculos de rúa, música, monicreques, teatro, comedia, danza, teatro de máscara e circo, comezará co espectáculo de rúa "Fitness", de Ibuprofeno Teatro, o venres 27 de xaneiro ás 18:00 h cunha aloucada e frenética muller adicta ao fitness, que desde a praza da Princesa até a farola de Urzáiz, dará unha clase colectiva de "ximnasia" presentando a programación de "Vigocultura" aos viandantes.

O venres seguinte, día 3 de febreiro, comezará a programación no Auditorio Municipal do Concello coa actuación de Radio Cos, o grupo de Xurxo Fernández e Quique Peón, que presentarán o seu novo disco "Pasatempo". O venres 10 de febreiro, a compañía viguesa Artello Teatro presentará na súa cidade o espectáculo "Non toques os meus círculos", espectáculo que obtivo a Mención de honra á posta en escena na Final de Ciencia en Acción 2016.

Compañías como Chévere, ButacaZero, Teatro de Ningures (conmemorando o Día Internacional da Muller), Voadora, Ilmaquinario, Kulunka Teatro, a compañía arxentina Criolla, Ibuprofeno (coa obra O Furancho, Premio María Casares 2016 ao Mellor Vestiario, Finalista nos Premios María Casares 2016 ao Mellor Autor e Premio Fetega ao Mellor Espectáculo e Mellor Actriz con Isabel Risco), Excéntricas (conmemorando o Día Internacional do Libro, co primeiro espectáculo de Valle-Inclán traducido ao galego da historia, A cabeza do Dragón, e dirixida por Quico Cadaval, que tamén está no elenco), e Traspediante e Pistacatro (Día Internacional da Danza), completan a programación adicada ao público adulto, que terá lugar os venres ás 21:00 h.

En canto á programación para toda a familia, que se desenvolverá os domingos ás 12:00 h, comezaremos con música con "A Nena Que Quería Navegar", de Redrum Teatro; completan a programación as compañías Expresión Produccións, Galitoon (espectáculo coa técnica da luz negra), Farrés Brothers&Cia (viaxe en globo “estático”, Premio Feten 2016), Limiar Teatro, Las Tricotouses (danza), Avoayouja (espectáculo para os máis pequeniños), Ghazafelhos, La Canica (conmemorando o Día Mundial do Libro Infantil e Xuvenil, Premio Feten 2016 ao mellor Espectáculo de Títeres), Perez&Fernandez (espectáculo infantil revelación no ano 2016 no panorama do teatro galego), Artestudio (conmemorando o Día Internacional do Libro, merecida homenaxe a Agustín Fernández Paz) e Otradanza.

En resumo, neste semestre haberá un total de 24 grupos e compañías programadas, con 25 espectáculos diferentes e 29 funcións.

Os prezos dos espectáculos seguen a normativa establecida tanto pola Rede Galega de Teatros e Auditorios como polas ordenanzas fiscais municipais. Así, os prezos das entradas para os espectáculos para adultos son de 5 e 8 €, dependendo dos cachés das compañías e grupos, e os dirixidos a público familiar de 3 e 5 €, polo mesmo criterio.

As entradas poderán adquirirse anticipadamente a partir de hoxe (sen gastos de xestión, ao mesmo prezo que no despacho de billetes), a través da páxina web de Ticketea (https://www.ticketea.com/organizers/concello_vigo/), no teléfono 902.044.226, na Central de Espectáculos (r/ Velázquez Moreno, 26), ou o mesmo día do espectáculo no despacho de billetes do auditorio, a partir dunha hora antes do comezo (sempre que houbese entradas dispoñibles).

Os abonos para a programación deste periodo pódense combinar entre todos os espectáculos en paquetes de 5 ou 10 espectáculos, con importantes descontos do 15 e 25 % respectivamente.

Páxinas

Subscribe to Noticias