Noticias

Programación "A NOITE BRANCA 2016"

A Concellería de Cultura promove o programa cultural "A NOITE BRANCA", que se desenvolverá o venres 12 de agosto. Esta iniciativa, iniciada hai tres anos, pretende salientar o patrimonio e actividades dos centros que forman parte da Rede Museística e Expositiva do Concello de Vigo (Pazo-Museo "Quiñones de León", Verbum-Casa das Palabras, Pinacoteca "Francisco Fernández del Riego", Casa Galega da Cultura, Casa das Artes, MARCO-Museo de arte contemporánea de Vigo e Museo Liste-Etnográfico de Vigo), nun horario amplo, procurando maiores atractivos para a cidadanía viguesa e para as persoas que visitan a cidade nestas datas. 

Ao igual que no ano anterior, súmanse a esta iniciativa os xacementos arqueolóxicos do Castro e o Centro de Interpretación do Mundo Romano (Toralla), dependentes da concellería de Patrimonio Histórico, a “Sede Afundación Vigo” e o Museo do Mar de Galicia.

A oferta, aberta a todo tipo de público, realízase seguindo criterios de gratuidade, participación da cidadanía, sustentabilidade e novidade.

O programa supón a ampliación do horario normal de funcionamento dos centros citados ata as 02:00 h (madrugada do sábado), ademais, inclúe unha serie de actividades paralelas como visitas guiadas (algunhas precisan inscrición previa), concertos musicais tanto nas rúas próximas como nos propios centros, exposicións...

Inauguración da exposición "Transbordo espacial. Partituras gráficas" na Casa das Artes

Este xoves 7 de xullo, ás 20:00 h, inaugúrase na planta primeira da Casa das Artes (r/ Policarpo Sanz, 15) a exposición "Transbordo espacial. Partituras gráficas" do Pelayo Fernández Arrizabalaga, dentro da programación do Festival de Jazz de Vigo "Imaxina Sons'16" que promove e organiza a Concellería de Cultura.

Formado nas artes plásticas e visuais e considerándose a si mesmo un músico “de ouvido”, Pelayo Fernández Arrizabalaga (Laredo, 1949) botou man de aparellos visuais para comprender a notación musical. O que nacía como un sistema de apoio no seu desenvolvemento musical tomou forma como proxecto plástico-musical coa construción dun círculo cromático de notas. A nota DO era vermella e, fronte a ela, SI era dun ton verde prado. Primero foron temas de Charlie Parker pasados a cor; despois a escritura cromática de “Giant Steps” de John Coltrane e, como derivación lóxica, naceu a partitura xiratoria. Un cadro, si, pero susceptible de ser lido por un intérprete musical.

Sen abandoar o concepto “partitura” pero afastándose do pentagrama tradicional, as obras de Pelayo Fernández foron incorporando novos símbolos e elementos xeométricos, en boa parte polo achegamento do artista á electroacústica. Seguía os pasos de compositores como Karlheinz Stockhausen ou Mauricio Kagel no uso de partituras gráficas.

Pelayo Fernández Arrizabalaga estudou Belas Artes en Madrid e durante os anos setenta foi saxofonista e clarinetista en formacións de jazz como Orgón e José Antonio Galicia Flamenco Jazz. Nos anos oitenta fundou Clónicos con Markus Breus, levando aos escenarios xoguetes, taladros, serras mecánicas, radios, tocadiscos, casettes, gongs, percusións, instrumentos convencionais e non convencionales “e cables, moitos cables”. Desde 1993 vive en Suíza, onde continúa a desenvolver proxectos de música improvisada e electrónica.

As partituras gráficas de Pelayo Fernández non son só visualizacións das súas composicións. En Vigo presenta unha selección de quince pezas de diferentes tamaños e formatos, a través deas cales achegouse á obra de músicos nos que tiña un interese especial: Claude Debussy, Olivier Messianen, Gianto Scelsi ou Jimmy Lyons. Nos traballos gráficos ideados polo artista non falta a representación de diferentes parámetros musicais: altura, volume, silencio, ruído, dinámica, duración, ritmo. Tamén improvisa con liñas e cores que logo interpreta.

Así acontece na peza “Transbordo espacial”, na que os intérpretes poden escoller diferentes camiños para a improvisación nunha rede de metro que combina liñas e transbordos. Unha peza sobre o chan, de grande tamaño, doce por catro metros, con lugares de cruce de liñas que funcionan como puntos de « Transbordo », puidendo o intérprete cambiar a outra liña de forma similar a como se fai no metro das cidades. Estes puntos de transbordo son lugares de parada e improvisación.

O día da inauguración, serán os membros de Vertixe Sonora Ensemble os que interpreten a peza gráfica, en concreto Mario Peris, violín, Pablo Coello, saxofón, Felipe Agell, clarinete, e Nerea Rodríguez, acordeón.

 

A exposición permanecerá aberta ao público ata o 4 de setembro de 2016.

Entradas esgotadas para o concerto de HERMETO PASCOAL dentro do "Imaxina Sons'16"

Infórmase que as entradas para o concerto do artista HERMETO PASCOAL previsto para este venres 1 de xullo no Auditorio Municipal do Concello, dentro do Imaxina Sons'16, están esgotadas. Por este motivo, o despacho de billetes do auditorio só funcionará para a recollida das entradas vendidas anticipadamente.

Inauguración da exposición "Airiños, aires. Rosalía" de Xurxo Lobato na Casa das Artes

Este venres 1 de xullo, ás 20:00 h, inaugúrase na planta baixa da Casa das Artes (r/ Policarpo Sanz, 15) a exposición fotográfica "Airiños, aires. Rosalía" do artista Xurxo Lobato, que pretende ser unha mirada nostálxica, evocadora da vida de Rosalía e da súa obra.

A exposición percorre a través de fotografías as paisaxes biográficas onde viviu Rosalía de Castro. Territorios, rúas, espazos vencellados a súa vida. Interpretados dunha maneira evocadora, suxerente, artística. Vigo, Padrón, A Coruña, Compostela, Bastavales, Dodro, Madrid, Simancas… É a mirada dun fotógrafo que busca a presenza da poeta a través das pegadas da súa obra e da súa vida.

A presenza da exposición en Vigo resulta importante, xa que foi a cidade onde se editou por primeira vez a súa obra “Cantares Gallegos”.

 

A exposición permanecerá aberta ao público ata o 31 de xullo de 2016.

Inauguración da exposición "Emporium. Mil anos de comercio en Vigo" no Verbum

Este mércores 29 de xuño, ás 12:00 h, inaugúrase no Verbum-Casa das Palabras (avda de Samil, 17) a exposición "Emporium. Mil anos de comercio en Vigo", unha produción da Concellería de Cultura, a través da Rede de Museos Municipais, comisariada por Adolfo Fernández e Pilar Barciela.

"Emporium" presenta mil anos de relacións comerciais de Vigo desde a Prehistoria ata a chegada dos árabes á Península. Mil anos nos que Vigo xoga un papel destacado na comunicación marítima do noroeste peninsular co resto do mundo coñecido, con momentos nos que foi o único enclave comercial en activo. Este aspecto do noso pasado, ata agora máis intuído que demostrado, ten á luz dos resultados das últimas investigacións arqueolóxicas, unha razón de ser.

"Emporium" artella o seu relato, de xeito sinxelo e didáctico, mediante máis de 200 obxectos arqueolóxicos, restaurados e documentados expresamente para a exposición, moitos dos cales se expoñen por vez primeira ao público. Pezas procedentes na súa gran maioría do Museo Municipal de Vigo “Quiñones de León”, con achegas puntuais doutros museos e institucións de Galicia e norte de Portugal, entre as que destacan algunhas de gran valor histórico como os cipos do Castro da Illa de Toralla, que permiten documentar a presenza de comerciantes feniciopúnicos na ría de Vigo arredor do século V. a. C.; a espectacular crátera romana da villa de Toralla (s. IV d. C.) reconstruída para a exposición e atopada no depósito vigués aínda que probablemente fabricada en Braga; ou a cruz paleocristiana (s. VII d. C.) da que un pequeno fragmento testemuña polo seu material, ouro, e a súa factura, ser doazón dun alto eclesiástico visigodo á igrexa que no Areal daba servizo aos fieis de Vigo, un dos máis importantes puntos do comercio marítimo do momento.

Recursos técnicos e museográficos complementarios permitirán achegarnos aos contextos nos que estas pezas se produciron e tiveron pleno significado. "Emporium" presenta con este fin unha peza audiovisual única que a ninguén deixará indiferente porque, de xeito virtual, vainos levar ao Vigo deses mil anos de comercio.

 

A exposición permanecerá aberta ao público ata o 28 de maio de 2017.

Ampliación horarios por exames na Biblioteca Pública Juan Compañel en xullo e agosto

Co obxecto de facilitar o estudo polo periodo de exames e o uso das instalacións públicas, a Biblioteca Pública Juan Compañel (r/ Joaquín Yáñez, 6), en colaboración coa Concellería de Cultura, ampliará o horario de apertura da súa Sala de Lectura, según o seguinte:

 

Periodo de ampliación: xullo e agosto.

Horarios ampliados durante ese periodo:

Luns a venres, non festivos: de 16:00 h a 20:00 h

Prórroga de exposicións na Pinacoteca FFR e no Museo "Quiñones de León"

A Concellería de Cultura prorroga as exposicións "Así nos ven, así somos?. A imaxen da muller na arte" e "Estraño cotián", que se expoñen actualmente na Pinacoteca Municipal "Francisco Fernández del Riego" e no Museo Municipal "Quiñones de León" de Castrelos, respectivamente. 

"Así nos ven, así somos?. A imaxen da muller na arte"  é unha produción da Concellería de Cultura, comisariada por Susana Cendán, que ten como un dos seus principais obxectivos a posta en valor dos fondos da colección de arte galega do Museo Municipal "Quiñones de León" de Castrelos —en particular— e do Concello de Vigo —en xeral—, recuperando para a actualidade a artistas extraordinarias das que había tempo non oíamos falar, é o caso de Elsa Pérez Vicente, Ana Legido, María Victoria de la Fuente, Legísima ou María Antonia Dans entre outras. A exposición prorrógase ata o 30 de outubro.

Pola súa banda, "Estraño cotián. A colección de Artes Decorativas do Museo Municipal de Vigo Quiñones de León”, tamén promovida pola concellería, recupera unha serie de obxectos da colección de artes decorativas do museo, obras que teñen relación coa convivencia diaria das persoas e que, na súa maior parte, chegaron ao museo fóra do seu contexto orixinal. A exposición prorrógase ata o 17 de xullo.

Arranca a venda de entradas e a inscrición na Academia de Sons do "IMAXINASONS'16"

Cando xa queda moi pouco para que arranque a festa do jazz en Vigo, este luns 20 de xuño, ás 10:00 h, comeza a venda anticipada de entradas para o 12º Festival de Jazz de Vigo Imaxina Sons. Esta edición, que se celebra do 1 ao 9 de xullo, promovida un ano máis polo Concello de Vigo, será inaugurada pola lenda da música brasileira Hermeto Pascoal. As entradas anticipadas poden adquirirse no servizo de Ataquilla (www.ataquilla.com e 902.504.500) e na Central de Espectáculos (Velázquez Moreno, 26), mentres que todas as persoas interesadas en participar nos obradoiros da Academia de Sons poderán facelo a través do teléfono municipal 010.

En 2016 o festival abre as portas a nove días de jazz cun grande concerto, o do brasileiro Hermeto Pascoal. Unha lenda da música que, aos seus oitenta anos, arranca en Vigo o 1 de xullo a súa xira europea. Principalmente pianista, pero tamén bandoneista, guitarrista, frautista e saxofonista é unha das figuras máis importantes da música brasileira. Tras acadar a popularidade no seu país nos anos sesenta, Hermeto Pascoal irrompe na escena estadounidense nos anos setenta onde colaborará entre outros con Miles Davis culminando a década coa participación no Festival de Montreux (Suíza) en 1978, que marca o comezo da lenda Hermeto Pascoal. Imaxina Sons comprácese en contar coa súa participación no festival cun concerto de apertura que, sen dúbida, sitúa esta décimo segunda edición nun magnífico estado de forma.

Apertura que terá lugar no Auditorio Municipal do Concello (Praza do Rei), columna vertebral de Imaxina Sons e escenario para grandes concertos en 2016: Julia Hülsmann, recoñecida como a poeta do jazz de Alemaña, o libanés Rabih Lahoud coa súa magnífica voz dentro do grupo Masaa, o pianista, compositor e ex director do festival Nani García ou a grande pianista Aki Takase coa súa particular homenaxe a Duke Ellington. O peche de Imaxina Sons 2016 no auditorio poñerano os extraordinarios músicos da Orquestra de Jazz de Matosinhos. Formada en 1999, esta iniciativa municipal é hoxe en día un laboratorio de proxectos no que as colaboracións internacionais están á orde do día. 

O MARCO volverá a ser o escenario durante tres xornadas de concertos arraiáns, desafiantes, excéntricos e cheos de virtuosismo co percusionista Robertoliveira, o saxofonista Frank Gratkowski e o trío FronTTon. A noite do festival trasladarase a partir do xoves 7 de xullo ao escenario da rúa Londres, con entrada libre, co trío do pianista portugués Pedro Neves, o jazz indie dos dinamarqueses Girls in Airports e o novo traballo do contrabaixista galego Kin García.

No caso dos concertos do Auditorio Municipal do Concello o prezo da entrada é de 5 euros máis gastos de xestión; no caso dos concertos do MARCO, 3 euros máis gastos. 

Pola súa banda, a Academia de Sons chega a súa cuarta edición con epicentro no MARCO. Esta proposta afonda, por unha banda, na vertente formativa e, por outra, na procura de novos públicos. No MARCO concéntranse catro obradoiros do luns 4 ao xoves 7 de xullo nos que divertirse, aprender, construír e relacionarse. Un convite á interactuación entre xeracións convidando a pequenos e maiores a experimentar ao redor da música e do jazz con incursións no audiovisual, nas artes plásticas, na tradición oral e até na neuroloxía. O venres 8 o obradoiro “Partituras gráficas” co artista Pelayo Fernández Arrizabalaga terá lugar na Casa das Artes, no marco da exposición “Transbordo espacial”.

Os obradoiros do MARCO son os seguintes: “Superpuppets playback” dirixido a familias (luns 4, 11h); ”Beatbox” dirixido a rapazas e rapaces a partir dos 11 anos (martes 5); “Tocando electrónica: botóns, teclas e froitas”, a partir de 6 anos e cun convite á participación de pequenos e maiores (mércores 6), e “Liñas, movemento, son”, a partir de 6 anos. As prazas son limitadas, os obradoiros gratítos e as inscricións poden facerse a partir deste luns día 20 no teléfono 010 (coste de chamada local) ou 986 810 260, se a chamada é de fóra da provincia ou con teléfono móbil.

Presentación do Festival de Jazz de Vigo IMAXINA SONS'16

A Concellería de Cultura presenta a programación da décimo segunda edición do Festival de Jazz de Vigo IMAXINA SONS, que se desenvolverá do 1 ao 9 de xullo en distintos espazos da cidade, con especial presenza do Auditorio Municipal do Concello, o MARCO e maila rúa Londres.

Imaxina Sons é unha iniciativa municipal que se mantén no tempo en base a parámetros de calidade artística e vontade de satisfacer a diversos públicos, a maiores dos afeccionados ao jazz. Unha aposta pola cultura desde o ámbito municipal, que fai que o festival poda manterse fiel aos seus principios de programar jazz europeo, dándolle aos vigueses a oportunidade de ver artistas de primeira fila, e de promocionar e apoiar o jazz galego e o jazz español.

Nesta edición, o festival preséntase coas baterías cargadas baixo a batuta de Lucía Martínez, que recolle a encomenda do concello de Vigo como nova directora artística de Imaxina Sons, sucedendo nesta tarefa a Baldo Martínez (2005-2010) e Nani García (2011-2015). Lucía Martínez (Vigo, 1982), é unha das multiinstrumentistas e compositoras máis destacada da nova xeración de músicos de jazz de Europa. Unha xeración coa ollada no sur, que no seu caso tradúcese na súa querencia polo folclore e a tradición oral. De cativa foi alumna da Universidade Popular de Vigo e en 2006 obtivo a súa licenciatura en percusión clásica no Conservatorio Superior de Música da cidade. Na actualidade reparte o tempo entre a súa cidade e Berlín, onde fixo o Mestrado en Jazz na Universidade das Artes, Universidade de Künste, e onde emprendeu novos proxectos musicais.

A percusionista viguesa ten como obxectivo reforzar e apoiar a presenza do jazz europeo, con especial atención á escena máis próxima. As marcas de identidade do Imaxina Sons xa son inequívocas ao longo destas doce edicións: atención ás figuras consolidadas e aos artistas emerxentes do jazz europeo, escaparate para as novas propostas do jazz en Galicia e na península, concertos ao aire libre que impliquen á cidadanía e apoio aos músicos e clubs da contorna próxima. Ademais Imaxina Sons debe entenderse como unha ferramenta cultural, auspiciada desde o ámbito administrativo máis próximo ao cidadán, o municipal, que ten como fin, tamén, vertebrar o espazo urbano como espazo de encontro e celebración da música.

IMAXINA SONS'16 abre as portas a nove días de jazz cun grande concerto, o do brasileiro Hermeto Pascoal. Unha lenda da música que, aos seus oitenta anos, visita Galicia por vez primeira. Principalmente pianista, pero tamén bandoneista, guitarrista, frautista e saxofonista é unha das figuras máis importantes da música brasileira. Tras acadar a popularidade no seu país nos anos sesenta, Hermeto Pascoal irrompe na escena estadounidense nos anos setenta onde colaborará entre outros con Miles Davis culminando a década coa participación no Festival de Montreux (Suíza) en 1978, que marca o comezo da lenda Hermeto Pascoal. Imaxina Sons comprácese en contar coa súa  participación no festival cun concerto de apertura que, sen dúbida, sitúa esta décimo segunda edición nun magnífico estado de forma.

Apertura que terá lugar no Auditorio Municipal do Concello, columna vertebral de Imaxina Sons e escenario para grandes concertos na presente edición: Julia Hülsmann, recoñecida como a poeta do jazz de Alemaña, o libanés Rabih Lahoud coa súa magnífica voz dentro do grupo Masaa, o pianista, compositor e ex director do festival Nani García ou a grande pianista Aki Takase coa súa particular homenaxe a Duke Ellington. O peche de Imaxina Sons 2016 no Auditorio Municipal do Concello poñerano os extraordinarios músicos da Orquestra de Jazz de Matosinhos. Formada en 1999, esta iniciativa municipal é hoxe en día un laboratorio de proxectos no que as colaboracións internacionais están á orde do día. Con grande pracer por parte do festival, a Orquestra de Jazz de Matosinhos estará por vez primeira en Imaxina Sons, na xornada de clausura desta edición, o sábado 9 de xullo.

O MARCO volverá a ser o escenario durante tres xornadas de concertos arraiáns, desafiantes, excéntricos e cheos de virtuosismo co percusionista Robertoliveira, o saxofonista Frank Gratkowski e o trío FronTTon. A noite do festival trasladarase a partir do xoves 7 de xullo ao escenario da rúa Londres co trío do pianista portugués Pedro Neves Trío, o jazz indie dos dinamarqueses Girls in Airports e o novo traballo do contrabaixista galego Kin García.

Unha nova edición de Imaxina Sons na que o jazz nas rúas volverá a mostrar a viveza da escena local e que, ademais, contará co programa de actividades “Academia de Sons” a desenvolver no MARCO por cuarto ano consecutivo. Un convite á interactuación entre xeracións convidando a pequenos e maiores a experimentar ao redor da música e do jazz con incursións no audiovisual, nas artes plásticas, na tradición oral e na electrónica. A inscrición para estas actividades realizarase a través do servizo de Atención Cidadá 010, a partir do luns 20 de xuño.

O xoves 7 de xullo, dentro do programa do festival, inaugurarase no primeiro andar da Casa das Artes de Vigo a exposición “Transbordo espacial. Partituras gráficas” de Pelayo Fernández Arrizabalaga. As partituras gráficas de Pelayo Fernández non son só visualizacións das súas composicións. A través delas achegouse á obra de músicos nos que tiña un interese especial: Claude Debussy, Olivier Messianen, Gianto Scelsi ou Jimmy Lyons. Nos aparellos gráficos ideados polo artista non falta a representación de diferentes parámetros musicais: altura, volume, silencio, ruído, dinámica, duración, ritmo. A exposición estará aberta até o 4 de setembro.

As entradas para os concertos de pagamento (Auditorio Municipal e salón de actos do Marco) poranse á venda anticipadamente o luns 20 de xuño no servizo de Ataquilla (www.ataquilla.com, teléfono 902.504.500 e Central de Espectáculos).

Presentación do "V Festival Primavera do Cine"

A Concellería de Cultura colabora coa agrupación cultural Reencanto Produccións na organización da quinta edición do Festival Primavera do Cine en Vigo, que naceu no ano 2012 co obxectivo de promover o sector audiovisual galego facendo visibles os seus filmes, de xeito que cheguen axeitadamente ao seu público natural. O festival tense convertido no máis importante do cine galego, comprometido coas artes audiovisual e co audiovisual galego, e apostando pola vertente internacional coa incorporación do mundo lusófono.

A programación do certame, dende o xoves día 19 e ata o vindeiro domingo 29 de maio, proxectará nas catro sedes (Auditorio Municipal do Concello, Instituto Camoes, MARCO e Sala Ingrávida de Porriño) cincuenta e cinco curtas e vinte e dúas longametraxes. O festival quere achegar a cinematografía galega e lusófona, en diferentes formatos e linguas, á xente non afeita a ver estas propostas porque non son exhibidas en salas comerciais. Esta quinta edición supón un punto de inflexión porque se duplica a oferta do ano anterior e ten vocación de asentarse, cun programa completo de cinema galego ao que se incorporan propostas da lusofonía. Como vén sendo habitual, o público tomará a decisión, cos seus votos, sobre as cintas gañadoras desta edición. 

O festival contará con actividades paralelas como é o caso das charlas-coloquio "Vías de colaboración entre o cine galego e lusófono", programada o sábado 21 de maio, e "O audiovisual galego e a súa interacción co público" que se desenvolverá o luns 23 coa presenza de Antón Reixa, Moncho Lemos ou Xosé Xoán Cabanas Cao. Ademais, haberá unha clase maxistral impartida polo director Mario Iglesias sobre a dirección de actores; o ciclo "Cine Miúdo", con proxeccións de filmes mudo para os máis cativos musicados en directo por Caspervek Trío; e dúas retrospectivas: unha dedicada a Alberto Estévez Piña e outra á cinta amateur "El andamio".

Páxinas

Subscribe to Noticias