Noticias

O director do MARCO, Iñaki Martínez Antelo, elixido novo presidente de ADACE

22 de febreiro de 2011-

O pasado xoves 17 de febreiro, coincidindo coa inauguración de ARCO'11, tivo lugar en Madrid a Asemblea de ADACE, Asociación de Directores de Arte Contemporáneo de España. Durante a devandita asemblea, o director do MARCO, Iñaki Martínez Antelo, foi elixido por unanimidade novo presidente da Asociación.

Ademais do novo presidente, a xunta directiva resultante da última asemblea de ADACE está integrada por un secretario, José Mª Parreño (ex director Museo Esteban Vicente, Segovia); un tesoureiro, Ferrán Barenblit (director Centro de Arte Dos de Mayo, Móstoles); e cinco vogais: José Guirao (director Casa
Encendida, Madrid), Bartomeu Marí (director MACBA, Barcelona), Agustín Pérez Rubio (director MUSAC, León), Yolanda Romero (ex directora Centro José Guerrero, Granada), e Ana Salaverría (directora programación Koldo Mitxelena, Donosti). Xunto a estes, son membros da asociación un total de 24 directores e ex directores de museos e centros de arte de todo o territorio español.

Premio "Os Bos e Xenerosos" oitava edición: homenaxe a Francisco Fernández del Riego

18 de febreiro de 2011-

O vindeiro sábado 19 de febreiro ás 12 horas terá lugar na Casa Galega da Cultura (CGC) a oitava edición do premio “Os Bos e Xenerosos”, que este ano recoñece a contribución á difusión pública da cultura galega de Francisco Fernández del Riego.

O acto, organizado pola Asociación de Escritores en Lingua Galega (AELG) coa colaboración da Editorial Galaxia, o Concello de Vigo-Casa Galega da Cultura e a Fundación Penzol, contará coas intervencións de Francisco Domínguez (director da Fundación Penzol), Cesáreo Sánchez (presidente da AELG), Mercedes Queixas Zas (secretaria xeral da AELG), e o escritor Víctor F. Freixanes.

Estrea do documental “Novo Vigo Vello”

17 de febreiro de 2011-
O tenente de alcalde, Santiago Domínguez, anunciou que
mañá venres, 18 de febreiro, o Centro Social de Novacaixagalicia acollerá a estrea do documental "Novo Vigo Vello: Vida e xente na reconquista do Casco Vello de Vigo", coa presenza Luis Tosar. Domínguez indicou que tamén haberá outro pase o domingo ás 12 para que todas as persoas interesadas teñan a opción de ver este documental financiado a través do Plan de Competitividade Turística. O filme xa está a ser distribuído nas canles de televisión, e a partir do segundo semestre deste ano entrará no circuíto de festivais estatais e internacionais.

Inauguración da exposición “O obxecto poético e a edición. Dúas achegas dende o surrealismo” no Verbum

15 de febreiro de 2011-
O vindeiro xoves 17 de febreiro ás 20 horas terá lugar no Verbum – Casa das Palabras a
inauguración da exposición temporal “O obxecto poético e a edición. Dúas achegas dende o surrealismo”, que se poderá visitar ata o día 1 de maio en horario de martes a domingo de 10 a 19 horas.

O acto contará coa presenza da comisaria da mostra, Monse Cea, representantes da Fundación Eugenio Granell e o director do museo Verbum, Rosendo Gonzalo Covelo Roma.

Presentación do grupo creativo audiovisual realizador da curtametraxe “Camiño da memoria”

16 de febreiro de 2011-
O vindeiro xoves día 17 de febreiro ás 19 horas na Casa Galega da Cultura darase a coñecer publicamente ao grupo creativo audiovisual formado polos realizadores/as da curtametraxe “Camiño da memoria”, filme que retorna a Vigo tras gañar o Amal Express no pasado mes de outubro, e de obter Mención Honorífica pola Sociedade galega de xerontoloxía e xeriatría no X Congreso Semer.

Á presentación acudirán os membros do grupo creativo, formado por mozos e mozas que coincidiron estudando Comunicación Audiovisual na Universidade de Vigo, e que decidiron apostar polas súas motivacións creativas e botar andar un proxecto que tivo a curtametraxe como proposta inicial e que en breve dará a coñecer outras producións como unha longametraxe documental sobre a pervivencia da poeta Rosalía
de Castro.

Presentación da exposición “Materialización” na Fundación Laxeiro

9 de febreiro de 2011-
O vindeiro xoves, 10 de febreiro ás 11:30, terá lugar na Fundación Laxeiro a presentación da exposición Materialización. Trátase dun proxecto realizado en colaboración coa Universidade de Vigo e a Universidade do País Vasco, no que participan os artistas Mónica Ortúzar, Elena Mendizábal, Ana Gesto Sol Alonso, Ignacio Barcia, Pablo Huertas, e Pello Mitxelena.

Na presentación da exposición, unha reflexión sobre o proceso de materialización da obra de arte desde que é concibida polo artista ata que se fai realidade e é amosada de forma pública, intervirán Xesús López Carreira, Presidente Delegado da Fundación Laxeiro, Antonia Blanco Pesqueira, Vicerreitora do Campus de Pontevedra, Carlos García Suárez Otero, Director Xeral da Fundación Laxeiro, e Javier Pérez Buján, Director artístico da
Fundación.

Presentación da nova programación do Auditorio Municipal

02 de febreiro de 2011-
O concelleiro de Cultura, Xesus López, presentou este martes a programación para febreiro e marzo do Auditorio Municipal, anunciando que abarca "todas as artes escénicas, ademais de outras actividades como cine, teatro, danza e música" para pequenos e maiores.

Inauguración da exposición “Proxecto Costa da Morte” no Museo do Mar

01 de febreiro de 2011-
O venres 4 de febreiro, ás 20:00, terá lugar a inauguración da exposición “Proxecto Costa da Morte” no Museo do Mar de Galicia. Trátase dun proxecto fotográfico de Fran Herbello, Graciela Sacco e Luis González Palma, comisariado por Manuel Sendón.

Inauguración da exposición “Valle-Inclán, Palabra e Imaxe” no Verbum

20 de xaneiro de 2011-
Mañá venres 21 de xaneiro ás 20 horas terá lugar no museo Verbum – Casa das Palabras a inauguración da mostra “Valle-Inclán, Palabra e Imaxe”.
Na inauguración está prevista a asistencia dos comisarios da exposición, José Telmo Grande Pérez e Paula Mariño Pazó (Ateneo de Bouzas quen a organiza xunto co Museo Verbum) e o Director do museo, Rosendo Gonzalo Covelo Roma.
A continuación da inauguración, haberá un recital a cargo de Teo Cardalda e María Monsonís que estrearán tres poemas de Valle-Inclán musicados polo compositor vigués e que forman parte do seu proxecto para o 2011: “Claves Líricas”, un disco libro sobre o autor.

As probas para a orquestra de Xovigo terán lugar os días 28 e 29 de decembro no auditorio do Conservatorio Superior de Música de Vigo

23 de decembro de 2010-
Os vindeiros días 28 e 29 de decembro, de 10 a 22 horas terán lugar as probas de selección para participar na Orquestra Xovigo no auditorio do Conservatorio Superior de Música de Vigo.
Tanto o proxecto do coro como da orquestra xuvenil Xovigo é unha iniciativa da Asociación Galega de Música Atlantic Musik, coa colaboración da Tenencia de Alcaldía.
A día de hoxe hai xa 112 persoas inscritas, un feito único para unha orquestra de nova creación, na que se podían inscribir rapaces e rapazas de entre 14 e 25 anos de toda Galicia e que contará con profesorado de ámbito internacional como Krzystof Chorzelski, que tamén participa no proxecto.
Máis info: 682148881 (en horario de 17 a 19 horas) e asociacionatlanticmusik@gmail.
com

Páxinas

Subscribe to Noticias