Noticias

O Auditorio Municipal acolle o concerto do alumnado do Conservatorio Profesional de Música

A Concellería de Cultura colabora unha vez máis co Conservatorio Profesional de Música de Vigo no concerto que terá lugar o mércores 18 de abril, ás 20:00 h, no Auditorio Municipal do Concello (praza do Rei, 1). O concerto correrá a cargo do alumnado do centro, con actuacións de guitarra, frauta, trío de metais, cuarto de cordas, cuarteto de metais, quinteto de cordas e conxunto de clarinetes. A entrada será libre até completar aforamento.

O concerto enmárcase dentro da liña de colaboración establecida entre a citada concellería e os conservatorios da cidade dende hai varios anos, co obxecto de ofrecer o espazo do auditorio para que o alumnado e/ou profesorado dos centros poidan amosar os seus traballos.

Peche provisional da Biblioteca Juan Compañel o sábado 31 de marzo

Infórmase que a Biblioteca Pública Juan Compañel (r/ Joaquín Yáñez, 6) permanecerá pechada, por motivos de seguridade, o sábado 31 de marzo, debido aos labores de desratización, desinfección e desinsectación, levados a cabo pola Consellería de Cultura, Educación e Ordenación Universitaria. 

O luns 2 de abril a biblioteca xa funcionará nos seus horarios habituais.

A segunda edición do Concurso de Piano "Cidade de Vigo" acolle a un centenar de participantes de catro continentes

Este venres, día 23 de marzo, comeza a segunda edición do Concurso Internacional de Piano "Cidade de Vigo" organizado pola Asociación de Música Clásica de Galicia, coa colaboración da Concellería de Cultura. En total serán 102 participantes de 30 países que competirán polos 14 premios que concede o concurso, cunha dotación total de 30.000 €.

O venres, ás 19:30 h, terá lugar o concerto inaugural no Auditorio "Martín Codax" do CSM, coa actuación de GIULIO DE PADOVA (gañador da 1ª edición) e ANDRÁS KEMENES (membro do xurado), que interpretarán obras de Rachmaninoff e Bach.

Do sábado 24 ao luns 26, tamén no auditorio do CSM, terán lugar as primeiras probas, namentres que o martes 27 serán as semifinais. O mércores 28 terá lugar a final cos 5 seleccionados, a partir das 17:00 h, no Auditorio Municipal do Concello. Ese mesmo mércores, ás 21:00h, celébrase a cerimonia de entrega de premios e o concerto dos gañadores.

O domingo 1 de abril, ás 20:00 h, o Auditorio Municipal do Concello acollerá o concerto de clausura, a cargo dos membros do xurado: TAMÁS VÁSÁRY, PABLO GALDO, CYPRIEN KATSARIS, PAUL BADURA-SKODA e JORGE LUIS PRATS; será un concerto a 4, 6 e 8 mans, no que se interpretarán obras de Schubert, Ganz, Lavignac, Rachmaninoff.

As entradas para os concertos están á venda no servizo de Ticketea desde 6 €.

A Casa Galega da Cultura acolle a exposición "Tecendo a nosa Historia" con motivo da Reconquista 2018

Este xoves 22 de marzo, ás 20:00 h, terá lugar na sala de exposicións da Casa Galega da Cultura (praza da Princesa, 2), a inauguración da mostra "Tecendo a nosa Historia", integrada nos actos da Reconquista da Vila de Vigo 2018, organizados pola AVC do Casco Vello, coa colaboración da Concellería de Cultura.

O obxectivo desta exposición é amosar a elaboración de tecidos tradicionais, a través dos utensilios que se usaban para facer o liño. Esta é unha fibra natural cultivada de xeito xeneralizado en Galicia no século XVIII, o seu uso para a fabricación de teas data do 7000 a.c. A resistencia á rotura da fibra do liño duplica á do algodón e está caracterizada pola sensación de frescura que produce no corpo xa que a fibra é boa condutora do calor. Trátase dun percorrido pola cultura material de Galicia a través dos seus traxes tradicionais.

A través das recompilacións feitas dende principios dos anos 70, tanto en bibliografía antiga, museos, testamentos, traballos de campo, fotografías, traxes encontrados en antigas casas de labranza e mesmo en grupos folclóricos, podemos falar hoxe en día do traxe tradicional galego.

En Galicia poderíase falar dun só traxe popular, xa que as pezas máis usuais, tanto nas mulleres coma nos homes son practicamente as mesmas. A maioría do traxe popular galego está confeccionado con tecidos obtidos a base de diferentes fiados de liño e lá: picote, candil, sanel, estameña, cúbica, mazcote, estopa, lenzo dá casa ou baeta son algúns deles. Aínda que non podemos esquecer aqueles que nos chegaron doutras culturas, tales como os veludos, os meriños, os panos de Béjar (sedan), os de Segovia, de Tarazona ou o de Terrejoncillo. Para cada peza existía un tipo de tecido e cada tecido, segundo o seu rematado e a súa elaboración estaba destinado a uso de cote, domingueiro ou cerimonial. En cada bisbarra ese mesmo tecido recibe diferentes nomes e diferentes aplicacións, segundo o estado social da portadora ou segundo a clase social desta.

Cada peza de roupa podía mellorarse en calidade, se fose para uso dos domingos ou para uso cerimonial, a mellora residía na riqueza ou calidade dos panos e tecidos ou no ornamento de aderezos e colares. A chegada da revolución industrial abaratou e encheu os mercados e feiras dun novo tecido denominado “percal” e a todo o tecido alleo ao caseiro comezouse a chamar “lenzo da feira” en lugar de “lenzo da casa” como eran coñecidos os nosos tecidos artesanais.

A exposición está comisariada por Patricia González Iglesias, formada como deseñadora de moda e patronista-escaladora.


A exposición permanecerá aberta ao público ata o 15 de abril, e contará con horarios de apertura especiais:

* Do 28 de marzo (mércores) ao 31 de marzo (sábado): de 11:00 a 14:00 h e de 18:00 a 21:00 h

* O domingo 1 de abril: de 11:00 a 14:00 h

* O sábado 7 e domingo 8 de abril: de 11:00 a 14:00 h e de 17:00 a 21:00 h

Entradas esgotadas para as funcións do espectáculo para bebés da compañía "VIU EL TEATRE" do 22 de abril

Infórmase que as entradas para as dúas funcións (12:00 e 18:00 h) do domingo 22 de abril da compañía VIU EL TEATRE, co espectáculo para bebés "Pintamúsica!", no Auditorio Municipal do Concello, están esgotadas. Por este motivo, o despacho de billetes do auditorio só funcionará ese día para a recollida das entradas vendidas anticipadamente.

Gañadores/as do XXII Maratón Fotográfico

Hai uns intres, durante o acto de inauguración da exposición na Casa das Artes (r/ Policarpo Sanz, 15), déronse a coñecer as persoas gañadoras dos premios estipulados nas bases do "XXII Maratón Fotográfico", que tivo lugar os días 25 e 26 de novembro pasados.

Nesta ocasión foron un total de 110 participantes que tiveron 24 h para fotografar catro temas: "Respecto", "Fuga", "Desliz" e "Unión".

O xurado, presidido polo concelleiro-delegado da Área de Cultura, Cayetano Rodríguez Escudero, estivo composto por:


Xisela Franco, cineasta documentalista

Javier Teniente, fotógrafo reporteiro

Rita Ibarretxe, fotógrafa e comisaria de exposicións

Rosa Mª Fernández, artista visual e fotógrafa

Victor Lago, fotógrafo

 

Os premios concedidos ás series fotográficas foron os seguintes:


- Primeiro premio, dotado con 1.000 €: LAURA PÉREZ MORÁN 

- Segundo premio, dotado con 500 €: ANDREA OGANDO VIDAL 

- Terceiro premio, dotado con 300 €:  Mª TERESA FERNÁNDEZ RODRÍGUEZ

- Un accesit, dotado con 100 €: MARÍA SAAVEDRA DÍAZ. 

 

 

A exposición, na que se expoñen a obra de todos os participantes e de forma ampliada a dos 20 seleccionados, permanecerá aberta ao público ata o 25 de febreiro.

 

 

A Casa das Artes acolle as exposicións do "XXII Maratón Fotográfico" e o "III Concurso de Relato Fotográfico Clínica Dental Susana Santeiro"

Este venres día 19 de xaneiro, ás 20:00 h, inaugúranse no primeiro andar da Casa das Artes (r/ Policarpo Sanz, 15) as  exposicións correspondentes ao "XXII Maratón Fotográfico" e mailo "III Concurso de Relato Fotográfico Clínica Dental Susana Santeiro".

O "XXII Maratón Fotográfico" está organizado pola Agrupación Fotográfica Galega, coa colaboración da Concellería de Cultura e da Clínica Dental Susana Santeiro. O maratón tivo lugar o 25 e 26 de novembro pasados, con preto de 120 participantes que tiveron 24 h para fotografar catro temas: "Respecto", "Fuga", "Desliz" e "Unión". Como é costume, durante o acto de inauguración, o xurado dará a coñecer as persoas gañadoras dos premios estipulados nas bases e que se conceden á serie fotográfica:

Primeiro premio: 1.000 €

Segundo premio: 500 €

Terceiro premio: 300 €

 

En canto ao "III Concurso de Relato Fotográfico Clínica Dental Susana Santeiro", nesta terceira edición presentáronse un total de 68 participantes, continuando coa repercusión internacional acadada en edicións anteriores. As bases do concurso indican que se debería contar unha historia nun máximo de seis fotografías, creando unha secuencia de imaxes cun fío conductor que xenere un relato. Os premios estipulados son os seguintes:

1º Premio: 1.000 € + Diploma

2º Premio: 500 € + Diploma

3º Premio: 250 € + Diploma

Premio especial do público: 300 € + Diploma

3 accésits: 50 € + Diploma

Premio de honor "Clínicas Dentais Susana Santeiro": 300 €

 

 

As exposicións permanecerán abertas ao público ata o 25 de febreiro.

Vigocultura oferta ata o mes de abril 36 funcións para todos os públicos no Auditorio Municipal do Concello

O venres 26 de xaneiro, ás 18:00 h, arranca a programación municipal de artes escénicas e musicais, VIGOCULTURA, correspondente ao primeiro semestre e organizada pola Concellería de Cultura. Trátase dun espectáculo de rúa "A tropa do Doutor Milagre" da compañía EducaTeatro, que irá desde a farola da praza de Urzáiz pola rúa do Príncipe; o espectáculo repetirase o sábado 27 no mesmo horario. Será o primeiro das 36 funcións previstas nesta nova tempada, que volverá contar con teatro, música, monicreques, comedia, danza, circo e un espectáculo para bebés.

A programación de música, teatro e danza VIGOCULTURA para os meses de xaneiro a abril volve apostar por unha liña de continuidade que pretende seguir consolidando públicos a través das artes escénicas cos mellores espectáculos que están nestes momentos circulando en Galicia e fóra dela, e incorporando novas linguaxes e formatos escénicos nunca vistos até o momento neste recinto. O programa contará con sesións para público adulto, os venres ás 21 horas, e con programación destinada a público familiar, que continuará realizándose os domingos ás 18 horas.

O venres 2 de febreiro comezará a programación no Auditorio Municipal do Concello, co último Premio Nacional de Teatro: a compañía Kamikaze co seu espectáculo Arte. A compañía Contraproducións, con Nacidas Libres, e o grupo musical De Vacas completarán a programación para adultos no mes de febreiro, que pechará coa última produción da compañía Voadora, Garage. Este espectáculo está protagonizado por traballadoras da industria automobilística, resultado dun conxunto de entrevistas realizadas nas fábricas na procura das mulleres e as súas circunstancias e que contará con traballadoras da fábrica de Citröen de Vigo e con voluntarias de diferentes xeracións vencelladas coa fábrica.

Dentro do apartado de estreas, podemos resaltar a compañía Ibuprofeno Teatro, que estreará a súa nova produción Casa O’Rei os días 2 e 3 de marzo; e a produtora viguesa De Ste Xeito Producciones, con Loló e Mamá o venres 20 de abril.

A maior novidade deste periodo consistirá nun programa especial denominado 3x3, que ofrecerá 3 espectáculos, 3 disciplinas artísticas e en 3 espazos distintos do propio auditorio, como son os cameríns, o vestíbulo e o propio escenario. As compañías Teatro en Punto, Teatro Aforo e Producións Dispersas serán as encargadas de que os espectadores pasen dun espazo a outro a través de curtas teatrais de 15 minutos, para rematar cun espectáculo íntimo e unipersoal no propio escenario.

Para os mais cativos e as súas familias a oferta complétase con compañías como Perez&Fernandez, Ghazafelhos, Malasombra Producións, Zum Zum Teatre, Tanxarina, Berrobambán e Elefante Elegante (co último Premio María Casares ao Mellor Espectáculo Infantil). Como en cada edición, haberá un espectáculo para bebés, neste caso a cargo da compañía Viu el Teatre.

Como ven sendo habitual, conmemorarase tanto o Día Internacional da Muller (8 de marzo) como o Día Internacional da Danza (29 de abril), con programación especial adicada a estas temáticas, a cargo de Teatro del Barrio, Caramuxo Teatro, Novagalega de Danza e Entremáns. Tamén haberá unha fin de semana adicada ao circo, protagonizado por Lucas Locus e Circo Mediterráneo.

Os prezos dos espectáculos seguen a normativa establecida tanto pola Rede Galega de Teatros e Auditorios como polas ordenanzas fiscais municipais. Os prezos das entradas para os espectáculos para adultos serán de 10, 9 e 8 €, dependendo dos cachés das compañías e grupos, e os dirixidos a público familiar de 5 €.

Para fomentar a utilización das canles de venda anticipada e para evitar as colas no despacho de billetes antes de comezar os espectáculos, cos conseguintes retrasos no comezo das funcións, o Concello asumirá o custe dos gastos de xestión na venda anticipada. Deste xeito, o espectador pagará o mesmo mercando a entrada en anticipada que o propio día no despacho de billetes do Auditorio. As entradas poderán adquirirse anticipadamente a partir do mércores 17 de xaneiro (sen gastos de xestión), a través da páxina web de Ticketea (www.ticketea.com), no teléfono 902.044.226, en Discos Elepé (r/ Doutor Cadaval, 35), ou ben o mesmo día do espectáculo, a partir dunha hora antes do comezo, no despacho de billetes do Auditorio (sempre que houbese entradas disponibles).

Os abonos para a programación deste semestre pódense combinar entre todos os espectáculos en paquetes de 5 ou 10, con importantes descontos do 10 e 25 % respectivamente.

Peche provisional das Bibliotecas Penzol e Fernández del Riego en horario de tarde

Infórmase que as Bibliotecas Penzol e Francisco Fernández del Riego, situadas na Casa Galega da Cultura (praza da Princesa, 2), permanecerán pechadas dende o martes 26 de decembro en horario de tarde e de forma provisional, por razóns de tipo técnico. Esperamos en breve recuperar os seus horarios habituais.

A Casa Galega da Cultura acolle a mostra "Tecido cru III" dende o xoves 14 de decembro

O xoves 14 de decembro, ás 20:00 h, inaugúrase na sala de exposicións da Casa Galega da Cultura (praza da Princesa, 2) a mostra "Tecido cru III", organizada pola Universidade de Vigo coa colaboración da Concellería de Cultura, e comisariada polas profesoras Lola Dopico e Cristina Varela.

Esta exposición forma parte dun ciclo que se pecha agora. Unha reflexión que se desenvolveu ao longo dunha serie de mostras nas que se pretendeu un achegamento á metodoloxía e aos aspectos procesuais do deseño de moda. Este é o territorio en que nos centramos nas exhibicións presentadas durante os últimos tres anos. A tese que subxace ao longo deste ciclo, unificada baixo o título "Tecido cru", fala de procesos construtivos, da posta en marcha de ferramentas conceptuais e de habilidades na formalización. É unha xanela a través da cal ás creadoras lles permiten acceder á morfoxénese: ese momento de orixe da forma que se deixa ler nas pezas seleccionadas e que, por tanto, non permite unha lectura «de estilo», tan habitual no ámbito que nos ocupa porque non é un discurso de moda, senon que nos deposita ante o proceso de aprendizaxe, ensaio e achegamento á construción de volumes tridimensionais, materializados en tecido e destinados a ser sustentados polo corpo humano. Estas pezas son o resultado de investigación duns creadores/as e do seu enfrontamento primixenio cara á procura formal e conceptual, na que para desenvolver a súa investigación deben deixar en suspenso todos os seus prexuízos e afondar no seu propio proceso de individuación.


A exposición permanecerá aberta ao público até o 28 de xaneiro.

Páxinas

Subscribe to Noticias