Noticias

A exposición "A nova Colección Colmeiro" prorrógase até xaneiro

A exposición "A nova Colección Colmeiro", composta polos vinteún óleos do artista que se incorporaron no ano 2017 aos fondos artísticos municipais, xunto a 145 obras sobre papel, prorrógase na planta baixa da Pinacoteca FFR até o 27 de xaneiro de 2019.

Están presentes nela practicamente todas as etapas do autor: o seu retorno a Galicia nos anos 20 do pasado século, con vistas singulares do porto vigués; a súa interpretación crítica da realidade galega nos anos 30, en paralelo á definición do seu renovador estilo pictórico; o impacto da Guerra Civil española que o une en dramatismo a predecesores como Goya ou a contemporáneos como Picasso; o seu posterior exilio parisiense; o seu regreso e presentación en España nos anos 50, 60, 70, etc.

Na colección tamén están todas as temáticas que lle son propias: principalmente o seu país galego, que capta a través da súa xente en romarías e traballos, das súas paisaxes; os traballos de estudio; as súas incursións na mitoloxía; os retratos... traballos todos eles nos que a muller brilla como gran protagonista. E todas estas temáticas desde a gran  variedade de técnicas coas que as abordou: óleo, tinta, lapis...

Por todo isto, o ingreso deste conxunto de obras na colección municipal de arte galega debe ser entendido como un acontecemento cultural de primeira orde. Reunir estas novas obras coas que de Colmeiro xa posúe o Concello de Vigo, converten a nosa cidade en referencia ineludible para coñecer ao pintor en todas as súas expresións e na súa máxima dimensión creativa.

Este martes día 18 de setembro terá lugar a reapertura do Museo Liste-Etnográfico de Vigo

Trala finalización das obras de mantemento acometidas durante o verán, o Museo Liste-Etnográfico de Vigo volve abrir as súas portas a partir do martes 18 de setembro, retomando a súa programación habitual coa exposición permanente e as actividades dirixidas tanto a escolares como a todos os públicos.

O Maratón Fotográfico 2018, que se celebrará o 29 de setembro, chega á súa viséxima terceira edición

A Agrupación Fotográfica Galega organiza, coa colaboración da Concellería de Cultura, a viséxima terceira edición do Maratón Fotográfico que terá lugar na fin de semana do 29 e 30 de setembro.

Poderán participar todas aquelas persoas maiores de catorce anos que formalicen a súa inscrición o día do maratón (sábado 29 de setembro) na Cafetería Sifón (r/ Doutor Cadaval, 5), entre as 12:00 e 12:45 h. Tamén se poderá facer unha preinscrición on-line cubrindo o formulario disposto na páxina web "www.agrupacionfotograficagalega.com". Os/as participantes deberán aboar a cantidade de 10 euros, en concepto de inscrición.

Poderase participar en categoría analóxica ou dixital (só nunha delas), e concederanse tres premios á serie fotográfica dotados con 1.000 €, 500 € e 300 €, respectivamente.

A saída do maratón terá lugar o sábado 29 de setembro ás 13:00 h; os/as participantes deberán entregar as fotos na sede da AFG (r/ Uruguai, 17, entrechán D), entre as 13:00 h e as 14:00 h do domingo 30 de setembro.

Coas fotografías seleccionadas realizarase unha exposición no Museo MARCO en datas a determinar; no acto de inauguración desta exposición darase a coñecer o veredicto do xurado.

Vigocultura oferta 21 funcións nos meses de outubro e novembro para todos os públicos no Auditorio Municipal do Concello

O venres 28 e o sábado 29 de setembro arranca a programación municipal de artes escénicas e musicais, VIGOCULTURA, que se desenvolverá nos meses de outubro e novembro, organizada pola Concellería de Cultura. Trátase do Mago Dani García que realizará pasarrúas pola rúa do Príncipe, rematando co seu espectáculo "Don Gelati" diante das escaleiras do Marco. Serán as primeiras das 21 funcións previstas nesta nova tempada, que volverá contar con teatro, música, danza, maxia, circo e un espectáculo para bebés e outro de rúa.

VIGOCULTURA volve apostar por unha liña de continuidade que pretende seguir consolidando públicos a través das artes escénicas cos mellores espectáculos que están nestes momentos circulando en Galicia e fóra dela. O programa contará con sesións para público adulto, os venres ás 21 horas, e con programación destinada a público familiar, que continuará realizándose os domingos ás 18 horas.

Entre os pratos fortes na oferta para público adulto, atópase Yllana, que nesta ocasión, en coprodución con Primital Bros, nos presentará o seu espectáculo musical “The Primitals”, unha función salvaxe que combina música e gargalladas a partes iguais.

Emedous Emoción&Arte estará en función dobre con “A Leituga”, un espectáculo que conta como cabeza de cartel con Antonio Durán Morris, o noso actor vigués máis distinguido. Destaca entre a programación, a coprodución entre LAZONA e o Centro Dramático Nacional, “Cáscaras Vacías”, un espectáculo inclusivo que non deixará indiferente a ninguén. Imposible saír do teatro sen sentir a pel de galiña.

Outra novidade será o espectáculo-conferencia sobre a danza contemporánea. O artista catalán Toni Jodar fará un repaso pola historia até a danza máis contemporánea. Unha conferencia bailada, explicada, que contará cunha charla-coloquio co artista ao rematar para todos os que desexen comentar con él os pormenores das artes do movemento.

Pola súa banda, Teatro Meridional presentaranos o seu último espectáculo, “Iberian Gangsters”, finalista na última edición dos Premios MAX. A programación para público adulto se completa coa presentación do recén estreado disco de Susana Seivane, e os últimos espectáculos das compañías galegas Talía Teatro e Teatro do Noroeste.

Na oferta para toda a familia poderemos ver a compañías ultrapremiadas como Spasmo Teatro, LANÖRDIKA ou Pata Teatro. Completan a oferta as compañías galegas Talía Teatro, Elefante Elegante, a maxia do Mago Teto e a música tolémica de Píscore, xunto co espectáculo para bebés “BBCircus” da compañía viguesa Asacocirco.

Os prezos dos espectáculos seguen a normativa establecida tanto pola Rede Galega de Teatros e Auditorios e PLATEA  como polas ordenanzas fiscais municipais. Os prezos para o espectáculo de Yllana será de 10 €, namentres que para o resto de espectáculos para adultos será de 8 €. Todos os espectáculos destinados a público familiar terán un prezo de 5 €.

Para fomentar a utilización das canles de venda anticipada e para evitar as colas no despacho de billetes antes de comezar os espectáculos, cos conseguintes retrasos no comezo das funcións, o Concello asumirá o custe dos gastos de xestión na venda anticipada. Deste xeito, o espectador pagará o mesmo mercando a entrada en anticipada que o propio día no despacho de billetes do Auditorio. As entradas poderán adquirirse anticipadamente a partir do xoves 13 de setembro (sen gastos de xestión), a través da páxina web de Ticketea (www.ticketea.com), no teléfono 902.044.226, en Discos Elepé (r/ Doutor Cadaval, 35), ou ben o mesmo día do espectáculo, a partir dunha hora antes do comezo, no despacho de billetes do Auditorio (sempre que houbese entradas disponibles).

Os abonos para a programación deste semestre pódense combinar entre todos os espectáculos en paquetes de 5 ou 10, con importantes descontos do 10 e 25 % respectivamente.

Peche da Pinacoteca FFR o domingo 12 de agosto

Infórmase de que, con motivo da proba de Descenso Urbano (MTB DOWNTONW) prevista no programa do MARISQUIÑO 2018 e que afecta á rúa Abeleira Menéndez, a Pinacoteca FFR non abrirá ao público o domingo 12 de agosto.

A Concellería de Cultura inaugura esta semana sendas exposicións de produción propia na Pinacoteca FFR e na Casa das Artes

A Concellería de Cultura inaugura este xoves 9 de agosto, ás 19:30 h, na Pinacoteca FFR (r/ Abeleira Menéndez, 8) a exposición "Catálogo de 1937. A colección de arte rexional na creación do Museo Quiñones de León", comisariada por Beatriz Liz de Cea e baixo a dirección técnica do director do museo, José Ballesta de Diego.

O 22 de xullo de 1937, en plena guerra civil, o museo municipal de Vigo “Quiñones de León” comezaba a súa andaina tras un proceso longo e laborioso de formación. O catálogo inaugural desta data permítenos coñecer de primeira man a colección exposta no momento da súa inauguración. Na mostra aténdese a aquelas obras que corresponden á colección de arte galega adscritas na súa maioría ao denominado movemento rexionalista. Moitas delas, case descoñecidas para o público, recuperan a súa presenza expositiva neste proxecto e así retornan ao panorama artístico e histórico da cidade.

Como se formou a colección inaugural de arte galega? Esta é a premisa da exposición. Dar a coñecer a primeira colección non só dende o punto de vista artístico senón tamén dende unha perspectiva histórica. Faise como resposta, como acto de xustiza e memoria, ao esforzo que supuxo a creación do museo municipal “Quiñones de León”, unha empresa comunitaria na que se involucraron as diferentes corporacións locais, os artistas e, para subliñar, os propios cidadáns vigueses. Deste xeito propoñemos un percorrido pola formación da colección do museo que achegue ao/a visitante a este esforzo conxunto, ao pulo da sociedade viguesa do primeiro terzo do século XX plenamente comprometida coa cultura.

Pola súa banda, o venres 11, ás 12:30 h, inaugurarase na planta baixa da Casa das Artes (r/ Policarpo Sanz, 15) a exposición "Só construíndo a mirada habitaremos a paisaxe", comisariada por Carlos Puga Gómez e vencellada á programación da NOITE BRANCA 2018. Trátase de 12 autoras e autores galegos, de distintas xeracións, idades e experiencias, con preto de 100 obras, que xiran ao redor da construción da paisaxe como forma.

"Porque a paisaxe, que sempre é unha invención cultural do ser humano, unha creación social, é tamén o mapa que deixa da súa forma de ser. Sérvenos, polo tanto, de índice do tema que acontece. Senón pensemos na pegada da bota de Neil Armstrong, din que no chan da lúa". Xabier Fernández (Copias de Autor) 

Este sábado 11 de agosto "A NOITE BRANCA" da RMM oferta unha manchea de actividades diversas para todos os públicos

A Concellería de Cultura promove o programa cultural "A NOITE BRANCA", que se desenvolverá este sábado 11 de agosto, dende as 20:00 ás 02:00 h. Esta iniciativa, que comezou hai seis anos, ten como principal obxectivo poñer en valor o patrimonio da nosa cidade á vez que desenvolve unha manchea de actividades nos centros que forman parte da Rede Museística e Expositiva do Concello de Vigo (Pazo-Museo "Quiñones de León", Verbum-Casa das Palabras, Pinacoteca "Francisco Fernández del Riego", Casa Galega da Cultura, Casa das Artes, MARCO-Museo de arte contemporánea de Vigo); todo nun horario amplo, procurando maiores atractivos para a cidadanía viguesa e para as persoas que visitan a cidade nestas datas. 

Ao igual que no ano anterior, súmanse a esta iniciativa os xacementos arqueolóxicos do Castro e o Centro de Interpretación do Mundo Romano (Toralla), dependentes da Concellería de Patrimonio Histórico, a “Sede Afundación Vigo” (a través do centro Naturnova) e o Museo do Mar de Galicia.

Fiel á súa filosofía de gratuidade, sustentabilidade e participación, "A Noite Branca" volve cunha oferta intensiva e diversificada, que obriga á escolla nunha noite de verán chea de vitalidade e xente nas rúas e nos diferentes espazos.

Sempre baixo o prisma de vinculación entre os espazos e as intervencións musicais, nesta sexta edición tanto a cidadanía como as persoas que nos visitan nestas datas, poderán gozar de concertos en espazos como a Casa das Artes, o Xacemento Arqueolóxico do Castro, o Museo “Quiñones de León”, os xardíns históricos de Castrelos ou o Verbum; ademais, haberá propostas musicais ao aire libre na rúa do Príncipe, arredor do Marco, e na praza da Princesa. Visitas guiadas, obradoiros participativos, interactividade, concertos, exposicións e a ampliación do horario co fin de potenciar, tanto nos equipamentos do centro da cidade coma na periferia, o desenvolvemento de actividades para todo tipo de público relacionadas coas coleccións e as exposicións.

En total serán 39 visitas guiadas convencionais, lúdicas, con representacións, obradoiros; 11 concertos musicais coa Orquestra Vigo 430, Gabriel Gasio, DAGDA, Red Vita, Katerina Linke, Proxecto Vermeer, Nastasia Sürcher, Cherry Sweet Band, Marlene Rodrigues&Nuno Fernandes e Aldaolado; 12 puntos de actividade, con ampliación de aperturas, exposicións permanentes e 9 exposicións temporais.

Ademais, na planta baixa e exteriores do Verbum terá lugar o programa "Os Tres Tempos", no que se presentarán os traballos de varios artistas internacionais, galegos e vigueses, que abarcan dende a poesía á arte e á danza, divididos nos tres tempos doverbo: presente, pasado e futuro. No referente á poesía, Raquel Lima (Lisboa), Samuel L. París (Santiago de Compostela), Marcos de la Fuente (Vigo), Nuria Vil e Charles Rapante (Vigo), Jose Lameiras e David Cid —M.D.S.— (Ourense) recitarán os seus versos, mentres que Kedro (O Porriño) interpretará rap e Underclock (Moaña) porá música electrónica. Noutros espazos do museo, tanto interiores como exteriores, pintarán en directo dous tatuadores vigueses e artistas dograffiti e a pintura mural (Roke, Abi Castillo, Mubs, Seds, Yasabesquien, Sax, Dashone, Gory, Lupita Hard). Destaca a presenza dunha das mellores graffiteiras internacionais, Holly Rock (Nova Zelandia), e o grupo Expostas que creará un mural colaborativo. Para completar a programación, a danza estará presente grazas aos cinco membros dos Galirockers, grupo vigués de breakdance e baile moderno, que farán pases e invitarán ao público a participar. Para rematar, haberá un freestyle de todos os participantes acompañados polo dj Gabry Massa (Vigo).

Peche provisional do Museo-Liste Etnográfico de Vigo por obras de mantemento

Infórmase do peche provisional do Museo Liste-Etnográfico de Vigo por mor de obras de mantemento no edificio, a partir do luns 16 de xullo. A súa reapertura está prevista para o martes 18 de setembro.

Traslado do concerto de "Manolo Gutiérrez Trío" ao Auditorio Municipal do Concello

Con motivo das previsións meteorolóxicas adversas, comunícase o traslado do concerto de Manolo Gutiérrez Trío, previsto mañán sábado día 30 de xuño na rúa Londres dentro do Festival de Jazz de Vigo, ao Auditorio Municipal do Concello. 


O concerto celebrarase ás 23:00 h e será de balde até completar o aforamento do auditorio.

 

Virxilio Da Silva substituirá a Glenn Zaleski para a súa actuación da noite do 3 de xullo no Festival de Jazz de Vigo

O pasado luns presentábase o programa do Festival de Jazz de Vigo, no que o pianista Glenn Zaleski aparecía como condutor de dúas das masterclasses, ademais da actuación no Auditorio Municipal do Concello de Vigo do martes 3 de xullo ás 22:30 h.

Unha lesión sofrida nas últimas horas vaille impedir actuar no citado concerto, tal e como estaba previsto, aínda que seguirá a cargo das masterclasses que xa estaban programadas para a mañá do luns, 2 de xullo e a do mesmo martes día 3.

A formación final programada para o martes, 3 de xullo, ás 22:30 h no Auditorio Municipal do Concello, será Da Silva/Douglas/Weinrib.

Virxilio da Silva, compositor e guitarrista, nace en Portonovo en 1984. Ata 2005, formouse integramente en Galicia: cabe destacar a súa etapa de formación jazzística xira no Seminario Permanente de Jazz de Pontevedra (2001-2005) da man de Abe Rábade e Paco Charlín. Forma parte, pois, da primeira promoción de músicos de jazz saídos dese Seminario tan singular, sen parangón en ningunha parte do Estado Español, e que se vén denominando a terceira xeración do jazz na Galiza.

Ao longo da súa traxectoria profesional ten tocado, e mesmo nalgúns casos gravado, con músicos de renome a nivel nacional, estatal e internacional. Recibiu o 1º premio na segunda edición dos Premios Galegos da Música Martín Codax (2015) na categoría de Músicas do Mundo con Mónica de Nut polo disco Dos fíos invisibles nacen as cores, e na terceira edición (2016) na categoría de Rock co grupo Foxy Freire. Tamén en 2015 obtén o premio ao mellor solista no Keep an Eye International Jazz Award do Conservatorium van Amsterdam. Lidera a banda JUZZ desde 2016. Combina esta actividade, coliderando outros proxectos como Fuzzo, Loiros e Foxy Freire, e que mostran a variedade estilistica na que Virxilio se sinte especialmente cómodo.

As entradas para este concerto adquiriranse mediante as mesmas fórmulas que as dos outros concertos de pagamento. As persoas que xa adquiriran unha entrada para a actuación de  Glenn Zaleski poderán elixir entre quedar coa entrada para ver esta nova formación ou ben recibir o reembolso do custo do billete.

Páxinas

Subscribe to Noticias