Noticias

O Festival de Jazz de Vigo oferta 19 formacións de grande calidade do 29 de xuño ao 4 de xullo

O Festival de Jazz de Vigo, organizado pola Concellería de Cultura baixo a dirección artística de Yago Vázquez e Felipe Villar, contará con 19 formacións e solistas internacionais, nacionais e galegos, que actuarán do 29 de xuño ao 4 de xullo en diversos espazos da cidade: Auditorio Municipal do Concello, Casa das Artes, Auditorio "Martín Códax" do CSM ou lugares ao aire libre como a rúa Londres ou a Praza da Princesa.

As entradas para os concertos de pagamento no Auditorio Municipal do Concello poden adquirirse dende mañán martes, día 19 de xuño  e sen gastos de xestión, a través da páxina web de Ticketea (www.ticketea.com), no teléfono 902.044.226, en Discos Elepé (r/ Doutor Cadaval, 35), ou ben o mesmo día do espectáculo, a partir dunha hora antes do comezo, no despacho de billetes do Auditorio (sempre que houbese entradas disponibles). 

Ampliación de horarios por exames na Biblioteca Pública Juan Compañel nos meses de xullo e agosto

Co obxecto de facilitar o estudo polo periodo de exames e o uso das instalacións públicas, a Biblioteca Pública Juan Compañel (r/ Joaquín Yáñez, 6), en colaboración coa Concellería de Cultura, ampliará o horario de apertura da súa Sala de Lectura, según o seguinte:

- Periodo de ampliación: xullo e agosto.

- Horarios ampliados durante ese periodo: 

Luns a venres, non festivos: de 16:00 h a 20:00 h

A Rede de Museos Municipais amplía os seus horarios de apertura con motivo do DIM'18

Como cada ano dende 1977, o ICOM (Consello Internacional de Museos) convida aos museos do mundo enteiro a celebrar o 18 de maio o Día Internacional dos Museos, creado para promover o interese xeral pola xestión e as actividades dos museos e centros de arte. O lema nesta ocasión é "Museos hiperconectados. Enfoques novos, públicos novos".

Por este motivo, a Concellería de Cultura amplía o horario de apertura ao público dos centros da Rede de Museos Municipais dende o xoves 17 ao domingo 20 de maio, según o seguinte:


Xoves 17, venres 18 e sábado 19 de maio:

* Casa das Artes, Casa Galega da Cultura e Pinacoteca FFR: de 11:00 a 14:00 h e de 18:00 a 21:00 h

* Verbum e Pazo-Museo "Quiñones de León" de Castrelos: de 11:00 a 14:00 h e de 17:00 a 20:00 h

 

Domingo 20 de maio:

* Casa das Artes, Casa Galega da Cultura, Pinacoteca FFR, Verbum e Pazo-Museo "Quiñones de León" de Castrelos: de 11:00 a 14:00 h

 

Por outra banda, o Museo Liste-Etnográfico de Vigo ofrecerá o venres 18 a actividade Furgolibro de Tia Ni ás 10:30 h, unha visita guiada ao museo ás 11:30 h e unha exhibición comentada sobre o lema do DIM'18 ás 12:30 h

Por último, o MARCO ampliará a oferta de visitas guiadas á exposición "XULIO VERNE. Os límites da imaxinación" o sábado 19 (ás 12:00, ás 18:00 h e ás 19:30 h) e o domingo 20 de maio (ás 12:00 h). 

Máis de 300 bailaríns dunha vintena de escolas da cidade participan este sábado no encontro "Vigo Danza"

A Concellería de Cultura organiza VIGO DANZA 2018 que terá lugar o sábado 12 de maio, ás 12:00 h, no Auditorio "Mar de Vigo", coa participación de 21 escolas de baile e danza da cidade e máis de 300 bailaríns.

O evento aúna os diferentes estilos de danza: desde a clásica á contemporánea, pasando polo hip hop, a tradicional galega, os bailes de salón ou o break dance, entre outros moitos.

A entrada será gratuíta mediante invitación, que poderá retirarse no despacho de billetes do recinto dende as 10:00 h, cun máximo de dúas por persoa. A entrada de público será a partir das 11:30 h.

A Concellería de Cultura inaugura a exposición "A nova Colección Colmeiro" na Pinacoteca FFR

Este venres día 4 de maio, ás 12:00 h, inaugúrase na planta baixa da Pinacoteca FFR a exposición "A nova Colección Colmeiro", composta polos vinteún óleos do artista que se incorporaron no ano 2017 aos fondos artísticos municipais, xunto a 145 obras sobre papel. 

Están presentes nel practicamente todas as etapas do autor: o seu retorno a Galicia nos anos 20 do pasado século, con vistas singulares do porto vigués; a súa interpretación crítica da realidade galega nos anos 30, en paralelo á definición do seu renovador estilo pictórico; o impacto da Guerra Civil española que o une en dramatismo a predecesores como Goya ou a contemporáneos como Picasso; o seu posterior exilio parisiense; o seu regreso e presentación en España nos anos 50, 60, 70 etc.

Na colección tamén están todas as temáticas que lle son propias: principalmente o seu país galego, que capta a través da súa xente en romarías e traballos, das súas paisaxes; os traballos de estudio; as súas incursións namitoloxía; os retratos... traballos todos eles nos que a muller brilla como gran protagonista. E todas estas temáticas desde a gran  variedade de técnicas coas que as abordou: óleo, tinta, lapis...

Por todo isto, o ingreso deste conxunto de obras na colección municipal de arte galega debe ser entendido como un acontecemento cultural de primeira orde. Reunir estas novas obras coas que de Colmeiro xa posúe o Concello de Vigo, converten a nosa cidade en referencia ineludible para coñecer o pintor en todas as súas expresións e na súa máxima dimensión creativa.

A Biblioteca Pública Juan Compañel amplía os seus horarios da sala de lectura nos meses de maio e xuño

Co obxecto de facilitar o estudo polo periodo de exames e o uso das instalacións públicas, a Biblioteca Pública Juan Compañel (r/ Joaquín Yáñez, 6), en colaboración coa Concellería de Cultura, ampliará o horario de apertura da súa Sala de Lectura, según o seguinte:

 

- Periodo de ampliación: mércores 2 de maio ao sábado 30 de xuño

 

- Horarios ampliados durante ese periodo: 

Luns a venres: de 20:30 h a 24:00 h

Sábados: de 16:00 h a 24:00 h

Domingos e festivos: 10:00 h a 14:00 h

Nova función para o espectáculo musical para bebés do día 22 de abril no Auditorio Municipal

Infórmase que a Concellería de Cultura pon á venda mañán venres día 13 as entradas para unha nova función da compañía VIU EL TEATRE, co espectáculo para bebés "Pintamúsica!",que se celebrará ás 16:30 h do domingo 22 de abril no Auditorio Municipal do Concello.

As entradas poderán adquirirse anticipadamente (sen gastos de xestión), a través da páxina web de Ticketea (www.ticketea.com), no teléfono 902.044.226, en Discos Elepé (r/ Doutor Cadaval, 35), ou ben o mesmo día do espectáculo, a partir dunha hora antes do comezo, no despacho de billetes do Auditorio (sempre que houbese entradas disponibles). As entradas para as funcións das 12:00 e das 18:00 h están esgotadas. 

O Auditorio Municipal acolle o concerto do alumnado do Conservatorio Profesional de Música

A Concellería de Cultura colabora unha vez máis co Conservatorio Profesional de Música de Vigo no concerto que terá lugar o mércores 18 de abril, ás 20:00 h, no Auditorio Municipal do Concello (praza do Rei, 1). O concerto correrá a cargo do alumnado do centro, con actuacións de guitarra, frauta, trío de metais, cuarto de cordas, cuarteto de metais, quinteto de cordas e conxunto de clarinetes. A entrada será libre até completar aforamento.

O concerto enmárcase dentro da liña de colaboración establecida entre a citada concellería e os conservatorios da cidade dende hai varios anos, co obxecto de ofrecer o espazo do auditorio para que o alumnado e/ou profesorado dos centros poidan amosar os seus traballos.

Peche provisional da Biblioteca Juan Compañel o sábado 31 de marzo

Infórmase que a Biblioteca Pública Juan Compañel (r/ Joaquín Yáñez, 6) permanecerá pechada, por motivos de seguridade, o sábado 31 de marzo, debido aos labores de desratización, desinfección e desinsectación, levados a cabo pola Consellería de Cultura, Educación e Ordenación Universitaria. 

O luns 2 de abril a biblioteca xa funcionará nos seus horarios habituais.

A segunda edición do Concurso de Piano "Cidade de Vigo" acolle a un centenar de participantes de catro continentes

Este venres, día 23 de marzo, comeza a segunda edición do Concurso Internacional de Piano "Cidade de Vigo" organizado pola Asociación de Música Clásica de Galicia, coa colaboración da Concellería de Cultura. En total serán 102 participantes de 30 países que competirán polos 14 premios que concede o concurso, cunha dotación total de 30.000 €.

O venres, ás 19:30 h, terá lugar o concerto inaugural no Auditorio "Martín Codax" do CSM, coa actuación de GIULIO DE PADOVA (gañador da 1ª edición) e ANDRÁS KEMENES (membro do xurado), que interpretarán obras de Rachmaninoff e Bach.

Do sábado 24 ao luns 26, tamén no auditorio do CSM, terán lugar as primeiras probas, namentres que o martes 27 serán as semifinais. O mércores 28 terá lugar a final cos 5 seleccionados, a partir das 17:00 h, no Auditorio Municipal do Concello. Ese mesmo mércores, ás 21:00h, celébrase a cerimonia de entrega de premios e o concerto dos gañadores.

O domingo 1 de abril, ás 20:00 h, o Auditorio Municipal do Concello acollerá o concerto de clausura, a cargo dos membros do xurado: TAMÁS VÁSÁRY, PABLO GALDO, CYPRIEN KATSARIS, PAUL BADURA-SKODA e JORGE LUIS PRATS; será un concerto a 4, 6 e 8 mans, no que se interpretarán obras de Schubert, Ganz, Lavignac, Rachmaninoff.

As entradas para os concertos están á venda no servizo de Ticketea desde 6 €.

Páxinas

Subscribe to Noticias