Noticias

A Casa Galega da Cultura acolle unha conferencia sobre a exposición "Hoxe toca o Prado"

O venres 5 de maio, ás 20:00 h, terá lugar no salón de actos da Casa Galega da Cultura (praza da Princesa, 2) unha conferencia a cargo de Fernando Pérez Suescun, xefe de contidos didácticos da Área de Educación do Museo Nacional del Prado, en relación coa exposición que se desenvolve na Pinacoteca Municipal FFR "Hoxe toca o Prado". A exposición é unha coprodución entre o citado museo e mailo Concello de Vigo, co patrocinio da Fundación AXA e a ONCE.

A exposición presenta reproducións en relevo dalgunhas das pinturas máis representativas do Museo Nacional del Prado. Son o Noli me tangere, de Correggio; A Gioconda, do taller de Leonardo da Vinci; A Fragua de Vulcano, de Velázquez; O cabaleiro da man no peito, de El Greco; o Bodegón con alcachofas, flores e recipientes de vidro, de Van der Hamen, e A antuca, de Goya. Móstrase tamén a reprodución dunha obra dos fondos municipais do Museo "Quiñones de León": Santa Cecilia, atribuída a Carlo Dolci.

Unha audioguía ofrece as indicacións necesarias para facer o percorrido táctil das pezas expostas. A exposición conta así mesmo con paneis e cartelas en braille. É, polo tanto, especialmente accesible a persoas con algún tipo de discapacidade visual.

Ademais, ofrécense lentes opacas —que impiden a visión— para lles facilitar esta interesante experiencia sensorial a todos os visitantes da exposición.

A exposición permanecerá aberta ao público ata o 14 de maio.

Ampliación horarios por exames na Biblioteca Pública Juan Compañel en maio e xuño

Co obxecto de facilitar o estudo polo periodo de exames e o uso das instalacións públicas, a Biblioteca Pública Juan Compañel (r/ Joaquín Yáñez, 6), en colaboración coa Concellería de Cultura, ampliará o horario de apertura da súa Sala de Lectura, según o seguinte:

- Periodo de ampliación: martes 2 de maio ao venres 30 de xuño, ambos inclusive.

- Horarios ampliados durante ese periodo:

Luns a venres: de 20:30 h a 24:00 h
Sábados: de 16:00 h a 24:00 h
Domingos e festivos: 10:00 h a 14:00 h

O MARCO presenta o seu programa educativo para 2017

Ao longo destes meses, o programa educativo do MARCO xira ao redor das exposicións “MULLERES DO SILENCIO”, inaugurada en outubro nas salas da planta baixa, e “ALÉN DOS XÉNEROS” (dende finais de xaneiro no 1º andar). De xeito estable, o programa para escolares desenvólvese paralelamente ás exposicións temporais do Museo, sacando partido da presenza das obras en salas e das súas posibilidades didácticas, con visitas e obradoiros específicos dirixidos a alumnado de distintas idades e ciclos educativos (Infantil, Primaria, Secundaria, Bacharelato, FP e outros ciclos).

A partir de xaneiro de 2017, a devandita programación veuse reforzada polo apoio da Obra Social “la Caixa” no desenvolvemento deste programa, cun incremento tanto no número de visitas e grupos participantes, como nas posibilidades de atención a grupos con necesidades especiais. Con esta colaboración, que nace con ánimo de continuidade, “la Caixa” pretende ofrecer aos grupos de escolares actividades complementarias ao seu traballo nas aulas, nas que se fomenten a arte e a cultura, e ás persoas con necesidades específicas opcións de ocio inclusivo.

As actividades, concertadas mediante cita previa, desenvólvense de martes a venres, en dúas quendas de 11.00 a 12.15 e de 12.15 a 13.30, e consisten en percorridos guiados polas salas de exposición, seguidos dun obradoiro no Laboratorio das Artes, o espazo de Didáctica no primeiro andar.

En canto aos contidos, a exposición “Mulleres do silencio” permite lecturas moi diversas en torno a cuestións clave —a evolución das obras pictóricas dende formatos máis tradicionais ata o concepto de pintura expandida; exercicios e xogos sobre a cor; soportes e materiais híbridos; xéneros como o retrato, o bodegón e a paisaxe— así como suscitar reflexións sobre a presenza das mulleres na historia da arte máis recente, algo especialmente relevante na mostra “Alén dos xéneros”.

A partir de maio, o programa renovarase coa inauguración nas salas da planta baixa da exposición “ÁNXEL HUETE. Unha revisión crítica”, que será a primeira presentación que fai un museo da traxectoria de Ánxel Huete (Ourense, 1944), artista indispensable para comprender o discorrer da produción artística en Galicia nas últimas décadas.


MARCO. Visitas e obradoiros para escolares

Para grupos de educación Infantil, Secundaria e Bacharelato

Colabora: Obra Social “la Caixa”

 

Do 10 xaneiro ao 23 xuño 2017

Lugar: salas de exposición e Laboratorio das Artes (1º andar)

Horario: de martes a venres de 11.00 a 13.30

[Previa cita no tel. 986 113900 ext. 304]

Peche provisional da Biblioteca Juan Compañel o sábado 15 de abril

Infórmase que a Biblioteca Pública Juan Compañel (r/ Joaquín Yáñez, 6) permanecerá pechada, por motivos de seguridade, o sábado 15 de abril, debido aos labores de desratización, desinfección e desinsectación, levados a cabo pola Consellería de Cultura, Educación e Ordenación Universitaria.

O luns 17 de abril a biblioteca xa funcionará nos seus horarios habituais.

Programación da Biblioteca Neira Vilas para segundo trimestre de 2017

A Biblioteca Municipal "Xosé Neira Vilas" (r/ Martínez Garrido, 21) presenta a súa programación para o segundo trimestre de 2017, que inclúe unha serie de actividades diversas, dirixidas a todos os públicos, e onde destacan as xa habituais como "A hora dos contos", "Contos Dakí" ou "Entre arrolos e contiños", ademais do club de lectura.

Compleméntase con actividades mensuais como os obradoiros, as mostras bibliográficas ou a celebración do Día do Libro (23 de abril) ou o Día das Letras Galegas (17 de maio).

Festival da música e das artes "Nas Ondas"

A Concellería de Cultura colabora na segunda edición do Festival da música e das artes "Nas Ondas", unha programación organizada polo Conservatorio Superior de Música de Vigo e que contará con numerosas actuacións, espalladas entre marzo e xuño. O certame terá como espazo principal o Auditorio "Martín Códax" e dependencias do CSMVigo, pero tamén se trasladará a outros lugares da cidade, como o Auditorio Municipal do Concello, o salón de actos do MARCO, o Auditorio de Beade ou a Praza da Pedra.

O festival organízase nunha serie de ciclos especializados: De Piano, Explurart, Letras Galegas, Ciclo de Cámara, etc., e outros eventos diversos, todos eles, abertos ao público xeral, e de asistencia libre e gratuíta. Xunto aos actos artísticos (concertos, montaxes escénicos, performances, etc.), o festival inclúe tamén relatorios, concursos, actos conmemorativos, xornadas de Portas Abertas, etc.

A través do programa de actividades Abrente, que se desenvolve en paralelo aos ciclos do festival, o CSMVigo establece colaboracións con outros centros e institucións, e intenta achegarse tanto a públicos especializados na música (alumnado, profesionais, etc.) como á cidadanía en xeral, facilitando no posible a difusión do quefacer diario do CSMVigo.

Igualmente, e indo máis alá da nosa contorna máis inmediata, o festival integra a presenza de numerosos docentes internacionais a través do programa Erasmus+. Trátase en definitiva dun programa transversal que trata de dar conta da multiplicidade das accións desenvolvidas desde o CSMVigo a prol dunha acción formativa, pero tamén social e cultural, comprometida coa cidade e máis alá.

Inauguración da exposición "O traxe e o viño fan o camiño" na Casa Galega da Cultura

O venres, 24 de marzo, ás 19:00 h, terá lugar na sala de exposicións da Casa Galega da Cultura (praza da Princesa, 2), a inauguración da mostra "O traxe e o viño fan o camiño", integrada nos actos da Reconquista da Vila de Vigo, organizados pola AVC do Casco Vello, coa colaboración da Concellería de Cultura.

O obxectivo desta exposición é dar a coñecer pequenos retallos da nosa historia que unidos formen unha imaxe de como vivían os nosos devanceiros hai máis de cen anos, e por suposto como vestían. Nesta ocasión imos retroceder 110 anos e coñecer como facían o viño e todas as tarefas arredor del.

Nesa época o que se cultivaba en cada fogar era para uso propio maioritariamente; o millo para facer pan e dar de comer ao gando, a horta para o sustento da familia e a uva para consumo na casa. O coidado da viña (poda, sachado, sulfatado, vendima, etc.) eran labores que se distribuían ao longo do ano. Este era un proceso duro, principalmente na nosa zona onde as viñas estaban emparradas baixas polo que tiñan que traballar axeonllados. Para ter un bo viño comezaban no inverno podando e atando as viñas, este era un proceso que había que coñecer moi ben, xa que unha mala poda estragaba a viña e reducía a produción de uva. Despois de podar ataban as viñas con vimbio.

Había que sachar as viñas para mantelas limpas de malas herbas e tiñan que sulfatalas para evitar enfermidades como o mildeu. Cando a uva madura, nos meses de setembro ou outubro, chega o momento de vendimar. A uva recollese e trasladase á bodega onde se esmaga e prensa para sacar o mosto que se introducía en barrís de carballo, onde fermentaba e se gardaba para usalo. Co bagazo (restos de uvas que quedaban despois de sacar todo o mosto) facían a augardente branca, se só se destilaba o bagazo, e de herbas se se engadían herbas aromáticas que lle daban o sabor característico.

Para estas tarefas a roupa que usaban era roupa de cotío, cómoda e sufrida, confeccionada con teas rústicas e fortes fabricadas artesanalmente (liño, pano, estameña, etc.) que resistían o paso do tempo. Inda que a maioría non tiña máis que unha muda, sentíanse orgullosos do seu traxe, e aínda que sinxelo, adornabanno con bordados, lorzas, etc e tinguían o liño para darlle cor, etc.

A exposición está comisariada por Patricia González Iglesias, formada como deseñadora de moda e patronista-escaladora. Crea o seu propio obradoiro de costura hai case 17 anos, onde investiga, deseña e confecciona artesanalmente traxes tradicionais, fundas para instrumentos a medida, vestidos para gaitas, etc. Dende hai anos é a profesora responsable do curso de costura tradicional da Asociación Veciñal do Casco Vello de Vigo, así como do asesoramento e confección do vestiario da representación da "Festa da Reconquista da Vila de Vigo". Posuidora de diversas distincións, tales como Certame de Xóvenes Deseñadores de Camariñas, Certame de Promoción da Moda Vigoferia e Mostra de Novos Creadores de Moda da Xunta de Galicia, ten tamén participado en conferencias e exposicións (A Reconquista de Vigo no Museo Quiñones de León, Mostra do Traxe Tradicional Galego no Casco Vello do Concello de Vigo, etc.).

A exposición conta coa participación de creadores escenógrafos, estudantes desta arte na ESAD de Galicia, xa que Vigo foi a cidade que veu nacer aos primeiros titulados superiores de Galicia nesta disciplina, que goza dun prestixio e dun recoñecemento importante a nivel internacional.

A exposición permanecerá aberta ao público ata o 16 de abril, e contará con horarios de apertura especiais o sábado 2 e domingo 3 (de 11:00 a 14:00 h e de 17:00 a 21:00 h).

A Fundación Penzol súmase á conmemoración do "Día de Rosalía"

O venres 24 de febreiro cúmprense 180 anos do nacemento de Rosalía de Castro, no que Galicia conmemora o Día de Rosalía para recoñecemento e ensalzamento de quen se convertiu nun dos signos máis importantes da nosa identidade.

A Fundación Penzol incorpórase a esta celebración expoñendo algúns documentos e publicacións existentes nos seus fondos, na entrada de acceso á Casa Galega da Cultura (praza da Princesa, 2). Esta mostra poderá ser visitada polo público, de luns a venres, 10:00 a 13:30 h e de 17:00 a 19:30 h. Ademais, ás 11:00 h, 12:00 h, 18:00 h e 19:00 h, explicaranse os contidos e pormenores do material exposto ás persoas presentes.

O material que se expón é o seguinte:

- Folla manuscrita de Rosalía con recolleita de cantares populares galegos.

- Correspondencia que dá conta de que aínda vive María Josefa Martínez Viojo, tía de Rosalía que a coidou de pequena en Ortoño:

     . Carta de Lois Tobío Campos a Rosalía de Castro.

     . Carta de Rosalía de Castro a Lois Tobío Campos.

     . Carta de Alejandra Murguía a Lois Tobío Castro.

- Libro “Cantares Gallegos”. Primeira edición do ano 1863 e outras posteriores.

- Libro “Follas Novas”. Primeira edición feita polo vigués Alejandro Chao en La Habana e outras edicións posteriores.

- Libro “Poesies Gallègues”. Tradución ao catalán dun extracto de Cantares Gallegos. Edición do ano 1917.

- Libro da tradución ao xaponés de “Cantares Gallegos”. Editado o ano 2009.

Traslado de data da conferencia sobre a exposición "Hoxe toca o Prado"

Comunícase que, por axustes organizativos, a conferencia prevista para este venres, día 24, no salón de actos da Casa Galega da Cultura a cargo de Fernando Pérez Suencun, xefe de Contidos Didácticos da Área de Educación do Museo Nacional del Prado e comisario da exposición "Hoxe toca o Prado", trasládase ao mes de abril, en data a concretar e que se anunciará no seu momento.

Inauguración da exposición accesíbel "Hoxe toca o Prado" na Pinacoteca FFR

O Museo Nacional del Prado e a Concellería de Cultura presentan a exposición "Hoxe toca o Prado”, que se inaugura o venres 24 de febreiro, ás 12:00 h, na Pinacoteca Municipal Francisco Fernández del Riego (r/ Abeleira Menéndez, 8), baixo o patrocinio da Fundación AXA e a colaboración da ONCE.

A exposición presenta reproducións en relevo dalgunhas das pinturas máis representativas do Museo Nacional del Prado. Son o Noli me tangere, de Correggio; A Gioconda, do taller de Leonardo da Vinci; A Fragua de Vulcano, de Velázquez; O cabaleiro da man no peito, de El Greco; o Bodegón con alcachofas, flores e recipientes de vidro, de Van der Hamen, e A antuca, de Goya. Móstrase tamén a reprodución dunha obra dos fondos municipais do Museo "Quiñones de León": Santa Cecilia, atribuída a Carlo Dolci.

Unha audioguía ofrece as indicacións necesarias para facer o percorrido táctil das pezas expostas. A exposición conta así mesmo con paneis e cartelas en braille. É, polo tanto, especialmente accesible a persoas con algún tipo de discapacidade visual.

Ademais, ofrécense lentes opacas —que impiden a visión— para lles facilitar esta interesante experiencia sensorial a todos os visitantes da exposición.

A exposición permanecerá aberta ao público ata o 14 de maio.

Páxinas

Subscribe to Noticias