Noticias

Saúda do concelleiro

Benvido ao novo lugar da Cultura de Vigo. Nesta nova páxina, poderás atopar a información máis completa sobre todas as actividades de ámbito cultural, promovidas e/ou apoiadas pola Concellería de Cultura do Concello de Vigo.

Música, teatro, danza, exposicións, museos, cine... A oferta máis ampla para toda a cidadanía. Unha páxina que nace coa vocación de informar e, coas túas suxestións, medrar continuamente e converterse nun espazo de referencia na nosa cidade. Porque a cultura é parte da nosa educación.

Esperamos que sirva para estar ao corrente da vida cultural municipal.

Cayetano Rodríguez Escudero
Concelleiro-delegado da Área de Cultura
Concello de Vigo

A Orquesta Clásica de Vigo conmemora cun programa ecléctico e contemporáneo o seu 35º aniversario

Coa colaboración da Concellería de Cultura, a Orquesta Clásica de Vigo conmemora este ano o seu 35 aniversario con seis concertos singulares, que pretenden ofrecer unha visión ecléctica e
contemporánea da música sinfónica.
 
A innovadora proposta da agrupación para esta temporada comezará o vindeiro 7 de marzo cun concerto en torno a dous grandes compositores coetáneos, Maurice Ravel e Vaughan Williams. Esta cita, que terá lugar no Teatro Afundación ás 20.30 horas, estará dedicada a un dos compoñentes da Orquesta Clásica de Vigo, que faleceu recentemente.
 
A seguinte sesión celebrarase o 6 de abril no Auditorio Municipal do Concello de Vigo, cunha viaxe musical ao universo de Purcell, Vivaldi e ao do primeiro Haydn. En maio, a formación presentará a obra de dous compositores coevos, Francis Poulenc e George Gershwin, no Teatro Afundación.
 
Beethoven e Mendelssohn serán os protagonistas do concerto do 12 de outubro no Teatro Afundación, onde se interpretarán as conexións entre a música sinfónica de ambos autores. Na programación tamén haberá espazo para un proxecto que conxugará electrónica, audiovisual e música clásica denominado Práctica Electroclásica, que se poderá ver no MARCO o 16 de novembro.
 
A temporada pecharase o 28 de decembro no Teatro Afundación co tradicional Concerto Extraordinario de Nadal, no que se combinará música de Sibelius coa banda sonora de Harry Potter, composta por John Williams.
 
Todas as propostas do ano no que se cumpre o 35 aniversario da Orquesta Clásica de Vigo están fiados entre si, agrupados por contrastes e artistas complementarios, nunha programación que busca conectar obras de distintas épocas e estilos para xerar lecturas únicas no público grazas á confrontación das diversas creacións.

Entradas esgotadas para o programa especial "3x3" do venres 1 de marzo no Auditorio Municipal

Infórmase que as entradas para a función do programa especial "3x3", prevista o venres 1 de marzo ás 21:00 h no Auditorio Municipal do Concello, están esgotadas. Por este motivo, o despacho de billetes do auditorio só funcionará ese día para a recollida das entradas vendidas anticipadamente. Quedan todavía entradas dispoñibles para o mesmo programa o sábado 2 de marzo a través do servizo de Ticketea.

Vigocultura oferta 37 funcións de artes escénicas e música para os meses de febreiro, marzo e abril

O venres 25 e o bado 26 de xaneiro arranca na rúa do Príncipe a programación municipal de artes escénicas e musicais, VIGOCULTURA, que se desenvolverá nos meses de febreiro, marzo e abril, organizada pola Concellería de Cultura. Trátase da compañía portuguesa Projeto EZ que realizará unha espectacular ruada, protagonizada por dous vehículos sorprendentes, con pases ás 18:30 e ás 19:30 h. Serán as primeiras das 37 funcións previstas nesta nova tempada, que volverá contar con teatro, música, danza, maxia, circo, monicreques, un espectáculo para bebés e un de rúa.

VIGOCULTURA volve apostar por unha liña de continuidade que pretende seguir consolidando públicos a través das artes escénicas cos mellores espectáculos que están nestes momentos circulando en Galicia e fóra dela. O programa contará con sesións para público adulto, os venres ás 21:00 h, e con programación destinada a público familiar, que continuará realizándose os domingos ás 18:00 h.

O venres 1 de febreiro comezará a programación no Auditorio Municipal do Concello, que todos os venres exhibirá espectáculos para adultos con compañías como Contraproducións, Eme2 Emoción&Arte, La Estampida, La Joven Compañía, A Berberecheira de Chévere ou Malasombra Producións.

Cabe destacar a edición por segundo ano do programa especial 3x3, que pretende achegar ao público ao Auditorio Municipal realizando funcións en diferentes zonas do mesmo coma o vestíbulo, os cameríns ou o propio escenario. Deste xeito, tres compañías realizarán 3 pezas de microteatro e os espectadores irán pasando dunhas zonas a outras do Auditorio.

O venres 15 de marzo, o grupo Talabarte presentará o seu novo disco contando coa presenza especial, como artista invitado, do grande percusionista bretón Dominique Molard, un evento excepcional que só se poderá ver en Vigo.

Para os máis pequenos e as súas familias a oferta completase con compañías como Culturactiva ou La Canica, un espectáculo para bebés (con tres pases), o Mago Cayetano Lledó, o musical A nena e o grilo máis aló, un espectacular traballo con pompas de xabón xigantes a cargo de Malasombra Producións ou o novo circo a cargo de La Banda de Otro.

Como ven sendo habitual, conmemoraremos tanto o Día Internacional da Muller (8 de marzo) co espectáculo “Anatomía dunha serea” da actriz Iria Pinheiro, como o Día Internacional da Danza (29 de abril) cunha fin de semana adicada integramente a esta disciplina e que contará con dous espectáculos de danza para adultos con Daniel Abreu (gañador de 3 Premio Max 2018, entre eles ao mellor espectáculo de danza), e con Paula Quintas. O domingo 28 de abril a compañía Da.Te Danza farao para os máis pequenos.

Na liña de apoio á creación viguesa, a programación contará con tres estreas: "UMMM!" da compañía Avento Producións Teatrais, "Facendo o Indio de Galitoon e Sorpresa!" de Enconarte Producciones.

Os prezos dos espectáculos seguen a normativa establecida tanto pola Rede Galega de Teatros e Auditorios como polas ordenanzas fiscais municipais. Os prezos das entradas para os espectáculos para adultos serán de 8 €, excepto o programa especial 3X3 que terá un prezo de 9 €, namentres que os dirixidos a público familiar serán de 5 €.

As entradas poderán adquirirse anticipadamente a partir do martes día 15 de xaneiro (sen gastos de xestión, ao mesmo prezo que no despacho de billetes), a través da páxina web de Ticketea, no teléfono 902044226, en Discos Elepé (r/ Doutor Cadaval, 35), ou o mesmo día do espectáculo a partir dunha hora antes do comezo, no despacho de billetes do Auditorio (sempre que houbese entradas dispoñibles).

Os abonos para a programación deste período pódense combinar entre todos os espectáculos en paquetes de 5 ou 10 espectáculos, con importantes descontos do 10 e 25 % respectivamente.

O Auditorio Municipal do Concello está adscrito ao Programa Platea de Circulación de Espectáculos que xestiona o INAEM en colaboración coa FEMP e forma parte da Rede Galega de Teatros e Auditorios. Desde decembro de 2017 tamén pertence á Rede Española de Teatros, Auditorios, Circuítos e Festivais de Titularidade Pública.

Ampliación de horarios por exames na Biblioteca Pública Juan Compañel no mes de decembro

Co obxecto de facilitar o estudo polo periodo de exames e o uso das instalacións públicas, a Biblioteca Pública Juan Compañel (r/ Joaquín Yáñez, 6), en colaboración coa Concellería de Cultura, ampliará o horario de apertura da súa Sala de Lectura, según o seguinte:


- Periodo de ampliación: luns 3 ao xoves 20 de decembro, ambos inclusive.

- Horarios ampliados durante ese periodo:

Luns a venres: de 20:30 h a 24:00 h

Sábados: de 16:00 h a 24:00 h
Domingos e festivos: 10:00 h a 14:00 h

A Concellería de Cultura únese un ano máis ao "Venres Neghro"

A Concellería de Cultura participará un ano máis no seu particular "Venres Neghro", que oferta descontos especiais para toda a programación de artes escénicas "Vigocultura", que ten lugar nas fins de semana no Auditorio Municipal do Concello.
 
Así pois, todas as persoas que compren as súas entradas entre os días 16 e 23 de novembro, gozarán de importantes descontos:
  • As entradas de 8 € pasarán a costar 5 €.
  • As entradas de 5 € pasarán a costar 3 €.
Estes descontos estarán dispoñibles a través de todas as canles de venda (web, teléfono, Discos Elepé e billeteira do propio auditorio).

O concerto de Susana Seivane cancélase por motivos de saúde da artista

A Concellería de Cultura informa da cancelación do concerto de Susanna Seivane, previsto o vindeiro venres 16 de novembro no Auditorio Municipal do Concello, por motivos de saúde da artista.
 
Dende Ticketea poranse en contacto con todas as persoas que compraron a súa entrada a través de internet para devolverlles o importe das mesmas; no seu caso, aquelas persoas que as compraron en Discos Elepé, poderán achegarse alí para recibir o importe da devolución correspondente.

Premiados/as no XXIII Maratón Fotográfico

Hai uns intres, durante o acto de inauguración da exposición no espazo anexo do Marco, déronse a coñecer as persoas gañadoras dos premios estipulados nas bases do "XXIII Maratón Fotográfico", que tivo lugar os días 29 e 30 de setembro pasados.

 

Nesta ocasión foron un total de 100 participantes que tiveron 24 h para fotografar catro temas: Calma, Múltiple, Resistencia, Inesquecible.

 

O xurado, presidido polo concelleiro-delegado da Área de Cultura, Jaime Aneiros Pereira, estivo composto por:

  • Jorge Lens, fotógrafo
  • Anxo Cabada, fotógrafo
  • Sara Miranda, fotógrafa
  • Puri Díaz, publicista e deseñadora
Os premios concedidos por unanimidade ás series fotográficas foron os seguintes:
  • Primeiro premio, dotado con 1.000 €: Jaime Rebollo Muñiz
  • Segundo premio, dotado con 500 €: María Isabel Santos Martínez
  • Terceiro premio, dotado con 300 €:  Jose Roberto Alarcón López

Na sala do vestíbulo principal, unha Retrospectiva 2013-2017, con selección de imaxes das series gañadoras nas cinco últimas edicións, que conforman unha mistura de temas, interpretacións, estilos e modos de transmitir a través da fotografía.

 

A Agrupación Fotográfica Galega, fundada en 1946 e aberta a todos os amantes da fotografía e do cine, foi pioneira en Galicia e veu desenvolvendo dende entón un importante labor, con actividades de formación e divulgación como cursos de fotografía ou faladoiros sobre foto e cine.

 

Foi en 1995 cando a AFG organizou o seu primeiro Maratón Fotográfico ‘Concello de Vigo’, que daquela se incluía dentro do programa de festas. Dende entón, o Maratón nunca deixou de celebrarse, se ben cambiou varias veces de espazo de exposición, evolucionou no seu formato e duración, e adaptouse aos cambios derivados dos avances técnicos e da fotografía dixital. Hoxe en día, aberto á participación de calquera persoa interesada e afeccionada á fotografía, o certame articúlase en torno a catro eixos: 24 horas de duración, 4 temas, 20/25 series seleccionadas, e 3 series gañadoras.

"Ciencia, filosofía e racionalidade", tema das Xornadas de Filosofía 2018

A Concellería de Cultura, baixo a dirección técnica do Grupo Aletheia-Vigo, presentan a viséximo quinta edición das Xornadas de Filosofía que terán lugar, no Auditorio Municipal do Concello (praza do Rei, 1), do luns 15 ao xoves 18 de outubro, ambos inclusive.

As xornadas sempre buscaron un tema de actualidade ou de enorme interese social para someter a debate. Cosmoloxía, relixión, economía, socioloxía, ética, ciencia, política, medicina… e outros moitos temas xa foron tratados en edicións anteriores. Este ano decidiuse propor o tema “Ciencia, filosofía e racionalidade", dimensións humanas que nos afectan a todos e coas que pretendemos lograr tres metas importantes na vida: unha visión o máis completa posible do mundo (ciencia), a procura da verdade en todos os nosos coñecementos (filosofía) e a felicidade (racionalidade práctica). 

Sobre esas metas van pivotar estas xornadas, tanto nos relatorios como nos debates. O programa ofrece oito conferenciantes elixidos co perfil adecuado ao tema proposto: científicos (Sánchez Ron, Ignacio Morgado, Antoni Fontdevila), filósofos (Emilio Ambrosio, Adolf Tobeña, Anna Estany) e éticos (Victoria Camps, Javier Sádaba). 

Este selecto plantel de catedráticos de Universidade van procurar convencer aos asistentes do importante que é sumarse á aventura de pensar, do pracer de coñecer e, sobre todo, de intentar ser felices nestes momentos de crise intelectual profunda. 

Ademais, a presente edición ten como aliciente ser unha merecida homenaxe a Jesús Mosterín, falecido fai un ano, e que foi un referente no espírito da historia das xornadas. Por este motivo, contaremos coa presenza da súa viúva, Úrsula Höpping, quen nos aportará datos relevantes sobre a figura do seu marido. De feito, o título das xornadas correspóndese co título dun libro de Mosterín, un dos máis significativos do filósofo por ter sintetizado nel as diversas arestas e multidimensionalidade  do seu pensamento. 

Por último, as xornadas convértense nesta edición nunha actividade extraescolar da UNED, con recoñecemento de créditos. A inscrición pode realizarse a través de correo-e no enderezo "xornadasaletheia@yahoo.es", ou o propio luns 15 no auditorio. A entrada é libre e de balde, até completar o aforo do auditorio.

A exposición "A nova Colección Colmeiro" prorrógase até xaneiro

A exposición "A nova Colección Colmeiro", composta polos vinteún óleos do artista que se incorporaron no ano 2017 aos fondos artísticos municipais, xunto a 145 obras sobre papel, prorrógase na planta baixa da Pinacoteca FFR até o 27 de xaneiro de 2019.

Están presentes nela practicamente todas as etapas do autor: o seu retorno a Galicia nos anos 20 do pasado século, con vistas singulares do porto vigués; a súa interpretación crítica da realidade galega nos anos 30, en paralelo á definición do seu renovador estilo pictórico; o impacto da Guerra Civil española que o une en dramatismo a predecesores como Goya ou a contemporáneos como Picasso; o seu posterior exilio parisiense; o seu regreso e presentación en España nos anos 50, 60, 70, etc.

Na colección tamén están todas as temáticas que lle son propias: principalmente o seu país galego, que capta a través da súa xente en romarías e traballos, das súas paisaxes; os traballos de estudio; as súas incursións na mitoloxía; os retratos... traballos todos eles nos que a muller brilla como gran protagonista. E todas estas temáticas desde a gran  variedade de técnicas coas que as abordou: óleo, tinta, lapis...

Por todo isto, o ingreso deste conxunto de obras na colección municipal de arte galega debe ser entendido como un acontecemento cultural de primeira orde. Reunir estas novas obras coas que de Colmeiro xa posúe o Concello de Vigo, converten a nosa cidade en referencia ineludible para coñecer ao pintor en todas as súas expresións e na súa máxima dimensión creativa.

Páxinas

Subscribe to Noticias